​Эдир тамиршанай амжалтанууд

Бүргэд Бадмацыренов Сандан шабитаяа Хамба ламын адиста хүртэбэ

Найдал түрүүлһэн залуу тамиршан Сандан Санда­нов мүнөө Москвада Олимпиин халааниие бэл­дэдэг 1-дэхи училищи түгэсхэжэ ябана. Үбэлэй амаралтын үдэрнүүдтэ нютагаа бусажа, түрэл агаараар амилан, шадал тэнхээгээ нэмээгээд бусаа.

Үйлсын уймар үхибүүдэй нэгэн

Арбаадхан наһандаа оһолтой тэнэгхэн ябагда­даг. Хүдөөдэ үйлсэ хэмжэжэ садаһан хүйхэр хүбүүд хэхэ газараа оложо ядаад, уршагта үйлэ бэдэрдэг. Эгэ­эл тиигэжэ ябаһаар, Сандан бэеэ һорижо эхилһэн. Хэдэн хүбүүдтэй хамта дэлгүүр тонохоо һэдээд, баригдаһан аабза. Тиихэдэнь Хүсөөтын һургуулиин захирал Сагаан-Нуурһаа мэдээжэ һоригшо Алексей (буряадаараа Сам­буу) Эрдынеевич Бадма­цыреновые урижа, боксын хэшээлнүүдтэ ябуулхыень захиһан юм. Тиигэжэ шан­га харууһан доро ороо бэ­лэй. Мухар-Шэбэртэ зэр­гэлээд оршодог Бэшүүртэ түрүүшынгээ туршалга ам­жалтатайгаар гараа. СССР-эй Герой Ефим Соломенни­ковэй нэрэмжэтэ турнирта түрүүлжэ шадаа.

Һоригшын һонор хараса доро

Үйлсэдэ үндыһэн үхибүүд шэрхи байдаг. Тэдэн бэрхэ тамиршад болодог гэһэн адаглалтаяа Алексей Эрды­неевич нэгэтэ намда тэм­дэглээ бэлэй. Ганса тами­рай шэглэл руу бүхыгөөрөө ороод, үргэлжэ бэеэ һорижо байбал, заабол дүнгүүд ерэ­хэ аабза.

Буряад Уласай габьяата һоригшо, Россиин боксын хүндэтэ ветеран Алексей Бадмацыреновэй шанга һорилго доро хэдэн бэрхэ та­миршад урган гараһан. Рос­сиин чемпион Семён Козлов, Россиин зэбсэгтэ хүсэнүүдэй чемпион Виталий Куприя­нов гэгшэдээрээ һоригшонь омогорхожо ябадаг. Гэбэшье Сандан бүри холо ошохо гэжэ этигэн найдадаг юм. Иигэ­жэ эдир тамиршанай түлөө һанаата болохо һоригшотой болоһониинь Санданда ёһотой аза талаан гэхэ бай­наб. Саашанхи замыень за­лан хүтэлхыень Алексей Эр­дынеевич Бүргэд хүбүүндээ даалгаһан. Һаяхана манай редакцида Бүргэд Алексе­евич Санданиие дахуулан ерэхэдээ, Москва ябуул­ха харгын мүнгэ нютагай түрүү хүбүүн, барилгашан Баир Зондуевай үгэһыень дуулгаа бэлэй. Мүнөө Сан­дан гүрэнэй хангалтатай һургуулида һорилго хэнэ гэжэ тэмдэглэлтэй.

Туйлалтанууд бии

Һоригшодой найдалынь юундэ бүхэнэгүйб гэхэ­дэ, Сандан үшөө эдирхэн, эдеэшээгүй наһандаа ябана ха юм. Гэбэшье амжалта­нуудынь олон. Гурбан жэ­лэй саана Сочидо үнгэрһэн СССР-эй Герой Нагулян Мар­тиросай нэрэмжэтэ уласхоо­рондын турнирта түрүүлжэ гараа. Тус турнирта Армени­ин, Азербайджанай, Абхази­ин, Узбекистанай, Казахста­най болон бусад гүрэнүүдэй шанга тамиршад оролсоһон байгаа. 54 килограмм жэн­дэ Сандан Ямало-Ненецкын тойрогой, Абхазиин, Арме­ниин тамиршадые булижа шадаа. Гадна урилдаанай түрүү тамиршан гэгдэһэн байна.

2017 болон 2018 онуудта Яхадта болон Чечен Уласта үнгэрһэн мүрысөөнүүдтэ ам­жалта түгэс хабаадаа. Россиин эдиршүүлэй урилдаанда нэгэдэхи һуури хоёр удаа абажа, Россиин тамирай мастерай нэрэ зэргэтэй болоһон. Рос­сиин томошуулай чемпионад­та илахань үлөө гэн гэһээм, Олимпиин наадануудта орол­сохо гээд, Бүргэд Алексеевич таһа дүүрэнэ һэн. Амжалта хүсэе!