​​Алас Дурнада амжалта туйлагдаа

Буряад Уласай команданууд “Мини футбол - в школу!” гэһэн бүхэроссиин түсэлэй гурбада­хи шатада ехэ амжалтатайгаар хабаадажа, түгэсхэлэй шатада орожо шадаа.

Гурбадахи шата хадаа федеральна тойрогуудта үнгэрдэг гээд, уншагшад­таа абаһаар лэ ойлгуулха хэрэгтэй. Мүнөө жэлһээ Буряадай тамиршад Алас Дурна зүгэй тойрогой мүрысөөндэ хабаадаһан байна.

Улаан-Үдэ хотын 64- дэхи һургуулиин басагад 2018 ондо бүхэроссиин финалда гурбадахи һуури эзэлээ һэн гээд һануулая. Харин мүнөө тэрэ амжал­таяа бүри үндэр болгохо­ор бэлэн.

2001-2002 онуудай басагадай мүрысөөндэ 64-дэхи һургуулиһаа гад­на, үшөө дүрбэн команда хабаадаһан байна. Буря­адай футболист басагад Хабаровскын хизаарай (6:1), Еврейн автономно тойрогой (10:2) болон Саха-Яхад Уласай (8:1) командануудые илажа гараа. Ганса Примориин хизаарай командатай 1:1 гэһэн тоотойгоор тэнсээ. Тиигэжэ 10 очко абажа, бэлигтэй һоригшо Ана­толий Чебаковай 64-дэхи һургуулиинхид түрүүлжэ гараа.

2003-2004 онуудай басагадай дунда Хэжэн­гын команда нэгэдэхи һуури эзэлээ. Тэдэ При­мориин хизаарай (6:2), Сахалинай можын (3:2) болон Саха-Яхад Уласай (6:0) команданууд дээрэ илалта туйлаа. Харин Ха­баровскын хизаарай на­адагшадтай 1:4 гэһэн то­отойгоор шүүгдээ. Бүхы наадануудай удаа Хэжэн­гын басагад Сахалинай можын түлөөлэгшэдтэй адли 9 очко абаһан байна. Бэе бэетэеэ наадаһанай дүн тодоруулан, түрүү һуури эзэлһэн командые элирүүлээ. Хэжэнгын ко­мандые Цыбик Дашиев һоридог юм.

Алас Дурна зүгэй ту­лалдаануудта Буряадай үшөө гурбан команда хо­ёрдохи һууринуудта гараа. Мүн тиихэдэ нэгэ команда хүрэл медальда хүртөө.

2007-2008 онуудай басагадай дунда Буря­адай наадагшад хоёр­дохи һуури эзэлээ. Тэдэ Камчаткын хизаарай наадагшадые 1:0 тоо­тойгоор шүүһэн байна. 2:2 гэһэн тоотойгоор Бу­ряадай басагад Примо­риин хизаарайхидтай тэнсээ. Хабаровскын хи­заарай командада хэды шүүгдэбэшье, манай ба­сагад мүнгэн медальда хүртөө.

2005-2006 онуудай ба­сагадай дунда Буряадай түлөөлэгшэд Сахалинай можын (6:2) болон Кам­чаткын хизаарай (3:2) тамиршадые шүүжэ га­раа. Примориин хизаа­рай командатай наада­яа 0:0 гэһэн тоотойгоор үнгэргөө. Хабаровскын хи­заарай басагадта 2:6 гэһэн тоотойгоор шүүгдэжэ, хо­ёрдохи һуурида гараа.

2007-2008 онуудай хүбүүдэй дунда Буряадай футболистнууд гурбадахи һуури эзэлээ. Һүүлшын нааданда тэдэ Примори­ин хизаарай командые 7:5 гэһэн тоотойгоор илаһан байна.

2005-2006 онуудай хүбүүд мүн лэ шангай һуури эзэлээ. Өөрын бүлэгтэ Буряадай эдиршүүл гурба дахин илалта туйлаа. Хахад фи­налай уулзалгада Ама­рай можын командые 3:2 гэһэн тоотойгоор шүүжэ гараа. Оройдоол финалда тэдэ бирагүйдэжэ, хоёрдо­хи һуури эзэлһэн байна.

Хэжэнгын суглуулагдамал баг