829
Буряад Уласай Толгойлогшо мартын 28-да Боксын Уласхоорондын эблэлэй (AIBA) делегацитай уулзаба. Улаан-Үдэдэ эхэнэрнүүдэй дунда боксоор дэлхэйн чемпионат байгша оной октябриин 3-һаа 13 болотор эмхидхэгдэхэ. Тамирай хэмжээ ябуулгануудай үнгэргэгдэхэ объектнүүд хэр зэргэ бэлэн бэ гэжэ шалгажа Боксын Уласхоорондын эблэлэй түлөөлэгшэд ерэһэн байна.
- Боксдо улас дотор хүнүүд дуратай. Манай басагайд уласхоорондын хэмжээндэ Ородой Холбоото Уласай нэрэ дээрэ үргэн ябадаг. Тамирша басагад гэртээ үнгэргэгдэхэ дэлхэйн чемпионадта һайн дүнгүүдые харуулха гэжэ найданабди. Тиигэбэшье ондоо гүрэнүүдэй тамиршад болон айлшад энэ мүрысөөн тухай һайнаар дурсажа, һанажа ябахын тула оролдохобди, - гэжэ Буряад Уласай Толгойлогшо Алексей Цыденов хэлэбэ.
АИБА эблэлэй техническэ талаар түлөөлэгшэ Джон Роуз Уэйн тэмдэглэһэнэй ёһоор, турнир эмхидхэгшэд уласхоорондын федерациин заабари, дурадхалнуудые хадуун абана. Тиихэдэ шухала асуудалнуудай нэгэн хадаа Улаан-Үдын транспортын талаар гараһан байна.
- Энэ талаар байдал хүнгэн бэшэ. Тиигэбэшье мүрысөөндэ хабаадаха гүрэнүүдтэй хамта хэлсэжэ, чартерна рейснүүдые эмхидхэхэбди, - гэжэ уласай хүйтэлбэрилэгшэ найдуулба.
Боксын Уласхоорондын эблэлэй түлөөлэгшэд тамиршадай байрлаха, мүрысөөнүүдэй үнгэргэгдэхэ талмайнуудые хаража, тамирай-спортивна комплекс хүрэһэн байна. Мүрысөөнүүдэй эхилхэһээ урид комисси дахинаа Буряад Улас ерэхэ юм.
Улаан-Үдэдэ эхэнэрнүүдэй дунда боксоор дэлхэйн чемпионат байгша оной октябриин 3-һаа 13 болотор эмхидхэгдэхэ. Байгша оной январиин 22-то чемпионадай үнгэргэгдэхэ болзор Боксын Уласхоорондын эблэл элирүүлһэн байна. Харин улаан-Үдэдэ дэлхэйн чемпионат үнгэргэхэ тухай шиидхэбэри AIBA эблэлэй гүйсэдхэхы хороон 2018 оной намар абаһан юм гээд һануулнабди.
