
Бүхэроссиин «RussiaLoppet» гэһээр санаар урилдаанай литэдэ Байгалай марафон ородог юм. Байгша оной апрелиин 19-20-ой үдэрнүүдтэ эмхидхэгдэхэ тамирай хэмжээ ябуулгада Ородой Холбоото Уласай можо нютагуудай болон хари гүрэнүүдэй 500-һаа дээшэ тамиршад хабаадаха. Тиихэдэ эгээл гүнзэгы нуурай мүльһэн дээрэ эмхидхэгдэхэ мүрысөөндэ паралимпиин болон сурдолимпиин тамиршад урилдаха.
Олимпиин наадануудай чемпион Юлия Чепалова болон 2007 оной дэлхэйн чемпионадай мүнгэн медальда хүртэһэн Василий Рочев гэгшэд Байгалай марафоной хүндэтэ айлшад юм.
Чехи, Япони, Эстони, Монгол болон Ородой Холбоото Уласай можо нютагуудай тамиршад Байгалай марафондо хабаадаха тухай мэдүүлгэнүүдые оруулһан байна. 2019 оной Дэлхэйн үбэлэй универсиадада дүрбэ дахин чемпионой нэрэ зэргэдэ хүртэһэн Алиса Жамбалова Байгалай эрьеэдэ санаар урилдаанда хабаадаха тухайгаа мэдүүлээ.
Санаар урилдаанай уласхоорондын федерациин олоной хабаадалгатай урилдаанай хорооной хүтэлбэрилэгшэ, Италида суутай 70 модоной зайда санаар урилдаха марафоной юрэнхылэгшэ Angelo Corradini техническэ делегадаар томилогдонхой.
Мүрысөөнэй түрүүшын үдэр, апрелиин 19-дэ, эдир тамиршад урилдаха. 14 наһатай үхибүүд 5 модоной зайда, 14 наһанһаа доошо үхибүүд нэгэ, гурба модоной зайда санаар мүрысэхэ. Энэл үдэр Сибириин болон Алас Дурнын федеральна тойрогуудта санаар урилдаа хүгжөөхэ талаар һоригшод семинарта хабаадаха юм.
Апрелиин 20-до Байгалай марафоной нээлгын баяр ёһолол үнгэргэгдэжэ, мүрысөөн ехэшүүлэй дунда үргэлжэлхэ. 21-59, 18-19 наһатай тамиршад 50 модоной зай гаталха. Эхэнэрнүүд болон 60-һаа дээшэ наһатай тамиршад 30 модоной зайда санаар урилдаха юм. Паралимпиин болон сурдолимпиин тамиршад 20 болон 10 модоной зайнуудта мүрысэхэ.
2018 оной Бүхэроссиин «RussiaLoppet» гэһээр санаар урилдаанай литэдэ Байгалай марафондо дэлхэйн 7 гүрэнэй болон Ородой Холбоото Уласай 23 можо нютагай 430-һаа дээшэ тамиршад хабаадаһан байна.