​​“Буряад үнэн” Хэблэлэй байшанай 73-дахи эстафетэ эмхидхэгдээ

Буряадай хүнгэн атлетикын мүнөө үеын эгээл нэрэ солотой тамиршан, Россиин чемпион Николай Вербицкий “Буряад үнэн” Хэблэлэй байша­най шанда хүртэхын тула ээлжээтэ 73-дахи эстафетын түрүүшын шата­да шалгараа.

Зунай тамирай хаһа нээдэг тус хэмжээ ябуулгамнай майн 5-да үнгэргэгдөө. Энэ удаа хабаадагша­дай тоо урда жэлнүүдэйхиһээ олон байгаа: 80 командада 800 гаран хүн урилдаа юм.

Түрүүшын урилдаанда 9 жэлэй ба тусхай һургуулинуудай команданууд хабаадаа. Олонхинь дунда ангинуу­дай һурагшадые эльгээжэ, ерээдүйн халаанай хаба шадал туршаба гээшэ. Эндэ 28-дахи санаторно һургуулиин түлөөлэгшэ бусадһаа хурдан байгаа.

Хоёрдохи урилдаанда тон олон хүн хабаадаа. Басагадай бүлэгтэ 25 һургуули командануудаа табяа. Түрүүшын шатада илаһанай түлөө 42-дохи һургуулиин 11-дэхи ангиин һурагша Алина Демьяненко Буряа­дай Тамирай ба залуушуулай бодол­гын яаманай тусхай шанда хүртөө.

- Би 7-дохи ангиһаа эхилээд, энэ эстафетэдэ хабааданаб. Тиихэдээ заал һаа түрүүшын шатада гүйдэгби, - гэжэ илагша хэлээ.

42-дохи һургуулиин командын бусад хабаадагшад баһал хурда­наар гүйлдэжэ, илалта туйлаа. Тус һургуулиин захирал Наталья Путило­ва:

- Манай һургуулида тамирта ехэ анхарал хандуулагдадаг. Тиимэһээл гурбадахи жэлээ таһалгаряагүй хоёр 1-дэхи һууринуудые эзэлнэбди, - гэжэ хэлээ.

Иван Жданов

Хүбүүдэй 23 команда мүрысөө. Түрүүшын шатада 14-дэхи гимнази­ин Иван Жданов шалгараа. Зүгөөр командань II һуури эзэлээ. Харин 42- дохи һургуулиинхид илалта туйлаа.

Дүрбэдэхи урилдаанда басага­дай 7 команда хабаадаһан байна. Түрүүшын шатада Буряадай гүрэнэй ехэ һургуулиин Оксана Котыхова түрүүлээ. Удаадахи урилдаанда 18 команда хабаадаа. Түрүүшын шатада Россиин чемпион Николай Вербиц­кий шүүгээ.

Мүрысөөнэй дүнгүүдээр дээдэ һуралсалай эмхи зургануудай дун­да Буряадай гүрэнэй ехэ һургуулиин оюутад хоёр дахин илаа. Дунда мэр­гэжэлэй һуралсалай эмхи зургаанууд сооһоо Багшанарай колледжын баса­гад болон ВСГУТУ-гай Технологиче­ска колледжын хүбүүд эрхимлээ.

Үйлэдбэриин эмхинүүдэй дун­да “ТГК-14” компаниин эхэнэрнүүд болон Тамирай байшангуудай ди­рекциин эрэшүүл амжалта туйлаа. Олониитын эмхинүүдэй бүлэгтэ “Беги, Улан-Удэ, беги!” командын эрэшүүл, мүн “Динамо” бүлгэмэй ба­сагад түрүүлээ. Сэрэгэй частьнуудай түлөөлэгшэдэй дунда 46108-дахи сэрэгэй частиин команда тон хурдан байгаа.

Мүнөө жэл дүрбэн урилдаанай дүнгүүдээр эрхимүүд элирүүлэгдэһэн байна. Тиин эрэшүүлэйшье, эхэнэрнүүдэйшье дунда Буряадай гүрэнэй ехэ һургуулиин оюутад эгээл хурданууд гэжэ тодоруулагдаа.

“Буряад үнэн” Хэблэлэй бай­шан ээлжээтэ 73-дахи эстафе­тэ үнгэргэлгэдэ туһа хүргэһэн “Шүлэндөө” кафе болон олзын хэрэг эрхилэгшэ Игорь Байминовта баяр баясхаланаа мэдүүлнэ.

Анна Огороднигой гэрэл зурагууд