​​«Шатар - һургуулида»

Агын 1-дэхи һургуулиин һурагшад һоригшотоёо

Иимэ гаршаг доро бүхэроссиин түсэл оройдо­ол хэдэн можо нютагуудта бэелүүлэгдэдэг байна. Тус түсэлдэ ородог һуралсалай гу­ламтануудай дунда түрүүшын мүрысөөн һаяхана Сочи хотодо боложо, Үбэр Байгалай хизаарай Агын 1-дэхи һургуули чемпион боложо тодороо.

“Дагомыс” гэһэн амаралгын болон элүүржүүлгын түбтэ үнгэргэгдэһэн энэ мүрысөөндэ Ородой 11 можо нютагай команданууд суглараа. Команда бүхэнэй бүридэлдэ 9 наһа хүрөөдүй дүрбэн шатаршан оруулагдаһан байна.

29 очко абаһан Агын 1-дэхи һургуулиин шабинар түрүүлээ. Удмурт Уласай болон Новосибирскэ можын үхибүүд шангай һууринуудые эзэлээ.

Илагшад - Аюша Рабданов, Тимур Хандаев, Дам­дин Дугаров болон Саянэ Ванданова гэгшэд 2-дохи ангида һурадаг юм. Тэдэ хоёрдохи жэлээ Александр Сампилович Долсоновой ударидалга доро һорилго хэнэ.