​​Түрүүшүүлэй дунда

Николай Вербицкий

Зунай тамирай хаһа үргэлжэлһөөр. Буряадай тамиршад эдэ үдэрнүүдтэ хэдэн мүрысөөнүүдтэ амжалтатайгаар хабаадаһан байна.

Жуковский (Московско можо). Аха дүү Знаменскийнуудай шанда хүртэхын түлөө бүхэроссиин мүрысөөндэ Николай Вербицкий шангай һуури эзэлээ.

800 метрэй зайда урилдаанда Буряадай тамиршан мүнгэн медальда хүртэбэ. Москвагай Константин Холмогоров эндэ түрүүлжэ гараа.

Һаяхана Буряадай тамиршан уласхоорондын мүрысөөнүүдтэ оролсохо эрхэтэй болоо. Юуб гэхэдэ, Ород гүрэнэй хүнгэн атледүүд допинг хэрэглэһэнэй түлөө өөрын туг доро хабаадаха эрхэеэ хаһагдаа бэлэй.

Июлиин 13-да болон 24-дэ ээлжээтэ мүрысөөнүүдтэ Николай Вербицкий хабаадахаар түсэблэнэ.

Челябинск. 18 наһа хүрөөдүй тамиршадай дунда Ородой чемпионадта Бэшүүр аймагһаа уг гарбалтай Максим Любовников хүрэл медальда хүртэһэн байна.

Максим 800 метр зайе 1 минута 54,52 секунда соо гүйжэ гараа. Иигэжэ тэрэ спортын мастерта кандидат боложо шадаа.

- Би оройдоол хоёрдохиёо томо мүрысөөндэ хабаадаһан байнаб. Минии түлөө һанаагаа зобоһон нютагайнгаа зондо баяр хүргэнэб, - гэжэ өөрын Instagram соо Максим Любовников мэдүүлээ.

Калуга. Залуушуулай дунда Ородой чемпио­надта Буряадай тамиршан Сергей Соловьёв шал­гараа.

Сергей  Соловьев һоригшотоёо

10 мянган метрэй зайда Сергей Соловьёв чем­пион болоһон байна. Тэрэ 30 гаран минутын тур­шада энэ зай гаталаа гээшэ.

- 10 мянган метр анха түрүүшынхиеэ гүйһэн байнаб. Ородой чемпионат шүүһэнэйнгээ удаа ёһотойл стайер болобо гээшэб. Минии амжалтада бүхы оршон тойронхи байдал туһалаа, - гэжэ Сер­гей Соловьёв дуулгана.

Гэхэтэй хамта, тус мүрысөөндэ манай тамир­шан 5 мянган метрэй зайда III һуури эзэлээ.