​​«Торгон замаар» тооһо бурьюулһаар...

Александр Гармаевай гэрэл зураг

Дэлхэйн эрдэни зэндэмэни Байгал да­лайе хүбөөлэн гаража, Хамар-Дабаанай хүтэлнүүдые дабаад, нэгэл мэдэхэдээ, захагүй ехэ Губиин дунда байбаб.

Александр Гармаевай гэрэл зураг

Эртын түүхэтэ “Торгон зам” гэжэ урилдаан мүнөө үедэ һэргээгдэһээр арбадахияа үнгэргэгдэбэ. Уласхоорондын хэмжээнэй энэ урилдаан мүнөө жэл Эрхүү хотоһоо эхилээд, Буряадай Сэлэнгэ ай­магай Харганада хоёрдохи шатань түгэсөө гэжэ бэшээ һэмди. Ази түбиин сүл ехэ Губиин тэг дун­да оршодог Хитадай Дуньхуан хотодо урилдаагаа түгэсхэһэн тамиршад Буряад орониие, хүндэмүүшэ арад зонииень ехэтэ магтаа. Иимэ һайхан орон ню­тагтай танилсаһандаа ехэ баяртайбди гэжэ булта­даа нэгэн дуугаар мэдүүлээ.

Александр Гармаевай гэрэл зураг

“Торгон зам-2019” урилдаанда Катар уласай хун тайжа Нассер Аль-Аттия болон Франциин Мэ­тье Бомэль хоёрой экипаж илажа гараа. Эхилхэһээ эршэмтэй байжа, Нассер бүхы харгыдаа хэндэшье хүсэгдөөгүй. Тэрэ уласхоорондын “Дакар” урилда­анда хоёр удаа дэмы илаагүй гэжэ үшөө дахин гэр­шэлээ.

II һуури Хан Вей Мин Ляо хоёр хитад эзэлжэ ша­даа. Гурбадахиие Жером Пелише болон Паскаль Ларрок хоёрой экипаж эзэлээ.

Александр Гармаевай гэрэл зураг

Мотоциклистнуудта угаа хүндэ байгаа гэжэ тэмдэглэмээр. Хоёр мөөртэй дугыгаар энэ ехэ зам гаталха гээшэ үнэхөөр ехэ баатаршалга мүн. Тиимэһээ нилээн олон тамиршад урилдаанһаа га­раа. Тэрэ тоодо манай Анастасия Нифонтова ган­га руу унажа, оморюугаа хухалаа. Захалхаһаа ур­дуур ябаһан Сэм Сандерленд түрүүлхэл ёһоороо түрүүлээ. Харин II, III һууринуудай түлөө бүришье шанга тулалдаан болоо. Тиигэжэ 2-дохиие Эндрю Шорт эзэлжэ шадаа. Андриен Ван Беверен 3-дахи ерээ.

Ашаанай машинанууд сооһоо түрүүлжэ ябаһан Сергей Вязович «Маз»-аараа Губида урбалдашоо. Тиигэжэ “КамАЗ-мастер” командын Антон Шиба­лов, Дмитрий Никитин, Иван Татариновай экипаж илажа гараа. II, III һууринуудые баһал “КамАЗ-ма­стер” команда эзэлээ.

Александр Гармаевай гэрэл зураг

“Торгон зам” үнэхөөр гүрэн түрэнүүдэй хилэнүүдые дабаһан, хэдэн арбаад гүрэнүүдэй эрэлхэг зониие нэгэдүүлһэн туйлай ехэ хэмжээ ябуулга бо­лоно гэжэ урматайгаар тэмдэглэмээр.

Александр Гармаевай гэрэл зураг

Харин ээлжээтэ “Торгон зам” 2020 ондо Парижһаа эхилхэ. Хүлеэн байхаб.

Александр Гармаевай гэрэл зураг

Александр Гармаевай гэрэл зураг