​​Урмашамаар үндэр дүнгүүд

Барилдаагаар болон хүнгэн атлетикээр Ородой чемпио­надуудта Буряадай наһатай тамиршад һайн үрэ дүнтэйгөөр хабаадаһан байна. Барилдаашад хоёр медальда хүртөө, хүнгэн атледүүд 7 медальтай гэртээ бусаба.

Московско можын Дзержинский хотодо барилдаашад суглараа. 176 хабаадагшадай дунда гурбаниинь Буряад Уласые түлөөлөө.

55-60 наһатай тамиршадай дунда Матвей Илюхинов чемпионой нэрэ зэргэдэ хүртөө. Тэрэ 88 килограмм хүрэтэр шэгнүүртэ хибэс дээрэ га­раа.

50-55 наһатай тамиршадай дунда Баяр Очиров II һуури эзэлжэ, мүнгэн медаль абаа.

Иимэ томо мүрысөөндэ анха түрүүшынхиеэ хабаадаһан Гар­ма Сандаков IV һуури эзэлжэ, ме- дальгүй үлэшөө.

Энэ мүрысөөндэ шангай һуури эзэлһэн тамиршад дэлхэйн чемпи­онадта хабаадаха эрхэдэ хүртөө. Ве­терануудай дунда үнгэргэгдэхэ энэ мүрысөөн октябрь һарада Тбилиси хотодо болохоор хараалагдана.

Москва хотодо эмхидхэгдэһэн хүнгэн атлетикээр ветерануудай дунда Ородой чемпионадта Буряа­дай гурбан тамиршан шалгараа.

Эгээл залуу ветерануудай дунда Наталья Макарова хоёр дахин чем­пионой нэрэ зэргэдэ хүртөө. 35-39 наһанай тамиршадай дунда 800 бо­лон 1500 метр зайда тэрэ түрүүлһэн байна. Эстафетэдэ Наталья Эрхүү можын командын бүридэлдэ оруу­лагдажа, мүнгэн медаляар шагнаг­даа.

Буряад Уласай спортын болон залуушуулай хэрэгүүдэй талаар яаманай дэргэдэхи ветерануудай зүблэлые хүтэлбэрилэгшэ Цырен Чирнинов 1500 метр зайда I һуури эзэлээ. Мүн 800 метр зайда III һуурида гараа. Цырен хадаа 55-59 наһатай тамиршадай дунда урил­даа.

65-69 наһатай ветерануудай дун­да Геннадий Мармушев 800 метр зайда урилдаад, хүрэл медальда хүртөө. Хяагтаһаа гарбалтай энэ та­миршан 10 мянган метр зайда хоёр­дохи ерээ.