​​Түрүү тамиршадай түрэһэн нютагта

Баян Юрөөгэй талада оршодог Ташар һууринда спортын шэнэ талмай августын 1-дэ нээгдэһэн байна. Сэлэнгын арад зон энээндэ ехээр баярлажа байһанаа мэдүүлнэ.

Ташар һуурин багашье һаа, олон мэдээжэ тамиршадай нютаг болодог. Һүүлэй жэл­дэ эндэ һур харбалга ехээр хүгжэнэ. Нютагай һоригшод Велингтон болон Дулма Ирин­цеевтэн һайнаар ажалаа ябу­улжа, нютагаархидаа дэлхэйн хэмжээндэ гаргана.

Дэлхэйн болон Европын чемпионадуудта шангай һууринуудые эзэлһэн, шанга тэмсээндэ шалгарһан Баир Цыбекдоржиев түрэһэн ню­тагтаа бусажа, һоригшотоёо бэлэдхэл хэхэ дуратай. Мүн 2019 оной бүхэдэлхэйн оюу­тадай наадан гэжэ тоологдо­дог Универсиадада чемпион болоһон, Ташарһаа гарбалтай Эрдэм Цыдыпов нютагаархи­даа ерэжэ амаршалаа.

16 метр утатай, 30 метр үргэнтэй талмайн нээгдэһэн тухай социальна холбоон соо Буряад Уласай Спортын болон залуушуулай хэрэгүүдэй тала­ар сайд Вячеслав Дамдинцу­рунов мэдүүлээ.

Аймагай засаг дарга Станис­лав Гармаевай мэдээсэһээр, спортын энэ талмай дээрэ Та­шарай бүхы ажаһуугшад бэеэ һорихо, амарха аргатай.

- Алас Дурнын тойрогой тэдхэмжээр Буряад Уласта түрүүшын иимэ талмай манай нютагта байгуулагдахадань баярламаар. Юуб гэхэдэ, Ташар һууринай тамиршад Сэлэнгэ аймагаа, Буряад ороноо холо ойгуур суурхуулжа ябана гээ­шэ, - гэжэ Станислав Гармаев баярай үгэ соогоо тэмдэглээ.

Хэдэн жэлэй саада тээ Та­шарта үбэлдөө һорилго хэхэ арга олгуулһан һур харбал­гын танхим нээгдээ бэлэй гээд һануулая.

Шэнэ талмай һургуулиин болон һур харбалгын танхи­май хажууда байгуулагдаа. Тиимэһээ нютагай ургажа ябаа залуу халаан спортоор бүри эршэтэйгээр бэеэ һорихо гээд найдагдана.

Хүндэтэ айлшад баскет­болой бүмбэгэ шэдэжэ, тал­май нээһэн байна. Удаань һонирхолтой нааданууд эм­хидхэгдээ.

Бага футболой наадануудта 8 команда оролсожо, эрхимые элирүүлээ. Эндэ Гусиноозёр­скын команда түрүүлжэ гараа.

Сэлэнгэ аймагай Нуур-Түхэм һууринда спортын шэнэ талмай һаяхана дэлгэгдээ бэ­лэй гээд һануулая.

“Селенгинский вестник” гэһэн бүлгэмэй зураг

Бадма ЯКШЕЕВ