​​Байгалай эрьедэ шатаршад тулалдаа

Июль һарын һүүлшын үдэрнүүдтэ Байгал да­лайн эрьедэ заншалта ёһоороо шатаршад сугларһан байна. Тиигэжэ “Байгалай үүрэй толон” гэжэ ээлжээтэ мүрысөөндэ тэдэ 26-дахияа уулзаба.

Эды олон жэлэй туршада тус мүрысөө эмхидхэгшэ хүүгэдэй һоригшо Хаян Сандакович Гар­мажаповай хэлэһээр, мүнөө жэл шатар наадажа урилдахаяа 195 хүн суглараа. Тэдэ тус тустаа гурбан бүлэг болон хубаараад наадаа.

“Опен-мүрысөөндэ” оролсоһон 92 тамиршад сооһоо эгээл һайн дүнгүүдые Буряадаймнай түрүү шатаршад харуулаа. Улас­хоорондын гроссмейстер Жам­саран Цыдыпов 7,5 очко абаад, чемпион боложо тодороо. Бай­гал далайһаа хүсэ абажа, һайхан арюун агаараар амилһан Жам­саран удаадахи мүрысөөнүүдтээ һайн дүнгүүдые харуулха бэзэ гээд найдагдана.

Нэгэдэхи һуурида гараһан тамиршантай адли очко абаһан ФИДЕ-гэй мастер Сэнгдоржо Дондуков хоёрдохи һуури эзэлээ.

Монголой тамиршан Болдоо Эрдэнэпурэв гурбадахи һуурида гаража, уласхоорондын мастер Олег Бадмацыреновые медальгүй үлээбэ.

Эхэнэрнүүдэй дунда баһа Монголой айлшан Номиндалай Тумурбаатар түрүүлһэн байна. Буряадаймнай залуу шатаршан Эрдэм Хубукшанов 2004-2006 онуудта түрэһэн тамиршадай дунда шалгараа.

“А” бүлэгтэ 2010-2011 онуудай эдиршүүл түрүү һуури эзэлэгшые элирүүлбэ. Кирилл Молоткин бо­лон Софья Унгаева гэгшэд алтан медальнуудта хүртөө.

Кирилл Молоткин

Герман НАМЖИЛОВАЙ гэрэл зураг

2011 оной шатаршадай дунда Монголой Батмалай болон Буря­адай Татьяна Имыхелова гэгшэд нэгэдэхи һууринуудые эзэлээ.

“Б” бүлэгтэ 50 шатаршад наадаһан байна. Ивалгын Алдар Бабаринов абажа боломоор 9 оч­когой 9-ыень абажа шадаа. Баса­гадай дунда Монголой Анудари түрүүлбэ. 

Алдар Бабаринов

Герман НАМЖИЛОВАЙ гэрэл зураг