Спорт 6 feb 2020 1708

​​Шэлэн абалгын тулалдаан

Буряадай түрүү тамиршад мүрысөөнэй туг үргэнэ

Буряадай ниислэлдэ үндэр хэмжээндэ болоһон тхэквондогоор (ИТФ) Алас Дурна зүгэй мүрысөөндэ ехэнхи медальнуудые доянгын эзэд абаһан байна. Ород гүрэнэй зүүн зүгэй можо, хизаарнуудай тамиршад анха түрүүшынхиеэ Улаан-Үдэ ерээ. Хабаровска ба Приморско хизаарнуудай, Амарай можын түлөөлэгшэд хэды шанга тхэквондистнуудтай байбашье, Буряадай хүбүүд, басагадай урда орожо шадаагүй. Юуб гэхэдэ, Буряадай тхэквондогой федерациин гэшүүд арба гаран жэлдэ ганса Ородой талмайнууд дээрэ бэшэ, мүн Европо болон Азиин, бүхэдэлхэйн тулалдаануудта түрүү һууринуудые эзэлнэ ха юм. Тус мүрысөөндэ ерэһэн Ород гүрэнэй Тхэквондогой федерациин түрүүлэгшын орлогшо Сергей Калантаев абаһаар лэ талмайн эзэдэй хүсэ шадал тэмдэглэнэ.

- Бүхы Росси дотор Буряадай тамиршад түрүүшүүлэй тоодо оролсоно. Олон жэлэй хугасаада амжалтануудаа дабтажа, хүн зониие гайхуулна. Тиимэһээ Алас Дурна зүгтэ аза талаантай, шанга тамиршадай байһанда баярламаар, - гэжэ ахамад шүүгшэ Сергей Калантаев хөөрэнэ. - 2019 ондо Ород гүрэнэй чемпионат Улаан-Үдэдэ болоо бэлэй. Эмхидхэгшэд бүхы арга шадалаа гаргажа, манай тхэквондогой түүхэдэ эгээл эрхимээр мүрысөө үнгэргөө гээшэ. Алас Дурнын тамиршан бүхэн дахинаа Буряадта ерэхэмнай гэхэдэнь, арсаха аргагүй байгаабди.

Буряадай суглуулагдамал команда эгээл олон тамиршадые табиһаниинь гайхалгүй. Иимэ томо мүрысөөндэ хабаадаха арга боломжоёо Загарай, Түнхэн, Мухар-Шэбэр аймагуудай түлөөлэгшэд хүсэд дүүргээ. Тиигэжэ Түнхэн аймагай Хэрэн һууринай баруун талада оршодог Горхоной дунда һургуулиин дэргэдэ һорилго хэдэг үхибүүд мүрысөөндэ ерэжэ, гурбан медальтай гэртээ бусаа.

- Нёдондо жэлэй намарһаа хүбүүд, басагад һорилго хэжэ эхилээ. Юуб гэхэдэ, Горхоной һургуулиин спортын зал Алас Дурна зүгэй тэдхэмжээр заһабарилагдаа. Бидэ мүнөө дулаан, һаруул газарта бэеэ бэлдэнэбди, - гэжэ тхэквондогой багша, Ород гүрэнэй чемпионадта хүрэл медальда хүртэгшэ Наталья Гармаева хөөрэнэ.

Сергей Калантаевай ойлгуулһаар, Алас Дурна зүгэй мүрысөөндэ шалгарһан тамиршад Ородой чемпионадта хабаадаха аргада хүртэнэ. Теэд можо, хизаарнуудһаа хэды хүн ошохоб гэжэ эгээл эндэ элирүүлэгдээ. Мүнөө жэл Ородой чемпионат наһанай табан бүлэгтэ Сочи хотодо февралиин 26-һаа мартын 2 болотор үнгэргэгдэхөөр хараалагдана. Ородой чемпионадта түрүү һууринуудые эзэлэгшэд Европын болон дэлхэйн чемпионадта ошохо аргатай. Тэдэнэй тоодо заал һаа Буряадай тамиршад оролсохо бэзэ гээд найдагдана.

Майн эхиндэ заншалта болоһон “Байгалай Кубок” гэһэн Уласхоорондын мүрысөөн болохо гээд хэлэлтэй. Нёдондо жэлһээ тус хэмжээ ябуулгын удаа Ородой суглуулагдамал команда бүридхэгдэнэ. Тэдэ Азиин чемпионадта удаань хабаадана бшуу. Тиимэһээ “Байгалай Кубогта” ганса Алас Дурна зүгэй тамиршад бэшэ, мүн Баруун болон Зүүн Сибириин тхэквондистнууд бэлиг шадабарияа харуулха.

Автор: Борис БАЛДАНОВ