​​Эрдэмэй ээлжээтэ туйлалта

Буряадай эдир шатаршан Эрдэм Хубукшанов Сербидэ болоһон уласхоорондын хоёр мүрысөөндэ шалгаржа, түрүү һууринуудые эзэлээ.

“Трофей Белграда” гэһэн мүрысөөн 33-дахияа болоно гээд хэлэлтэй. Тус мүрысөөндэ Эрдэм Хубукшанов бүхы хабаадагшадай дунда 6 очко абажа, 17-дохи һуурида гараа. Мүн 16 наһа хүрөөдүй тамиршадай дунда эгээл һайн дүн харуулаа. Эрдэмэй һоригшо Тимур Иванов баһа 6 очко абаад, 14-дэхи һуури эзэлээ.

“Раднички чесс” гэһэн уласхоорондын мүрысөөндэ эдир шатаршантай тэмсэхэ хүн олдоогүй. 7 очкотой Эрдэм эндэ түрүүлээ. Мүн Тимур Иванов хахад очкогоор гээгдэжэ, шангай хоёрдохи һуури эзэлһэн байна.

- Энэ мүрысөөн маанадта ехэ баяр асараа. Юуб гэхэдэ, манай шаби Эрдэм Хубукшанов түрүүшын мүрысөөнэй һүүлээр рейтингээ 31 очкогоор нэмээгээ. Хоёрдохи мүрысөөндэ чемпион болоод, уласхоорондын мастерай хоёр балл абаа. Иимэ нэрэ зэргэдэ хүртэхын түлөө гурбан балл хэрэгтэй юм. Январиин 1-нэй һүүлээр Эрдэм 2350-һаа үлүү очкотой болоод байха. Тиимэһээ, тэрэ “ФИДЕ-гэй мастер” гэһэн нэрэ зэргэдэ хүртэхэ, - гэжэ уласхоорондын мастер Тимур Иванов хөөрэнэ.