​Монголой 85 наһатай Ц.Раднаа ветерануудай дунда хүнгэн атлетикээр Азиин абарга шалгаруулха тэмсээндэ дэлхэйн рекорд сохёо

Байгша һарын эхеэр Малайзиин Кучинг хотодо үнгэрһэн ветерануудай дунда хүнгэн атлетикээр Азиин абарга шалгаруулха тэмсээн боложо, тэндэ хабаадаһан 21 гүрэнэй 2500-гаад тамиршадай дунда Монголой түлөөлэгшэд үндэр амжалтануудые туйлаба.

85 наһатай Ц.Раднаа 400 метртэ түрүүлжэ, дэлхэйн шэнэ туйлалта тогтоохоһоо гадна утые һүрэлгөөр хүрэл медальда хүртөө. Тэрэ бүхы наһаараа Өмнөговь аймагта бэеын тамирай багшаар ажаллаһан юм.

– Манай Өмнөговиин зон хүнгэн атлетикээр улас соогоо түрүүлдэг. Томо-томо тэмсээнүүдтэ илалта туйладаг. Эхэ ороноо түлөөлэн, уласхоорондын хэмжээндэ амжалта гаргаһан олон тамиршад манай нютагта бии. Харин би 30-аад жэл соо һорилго хэжэ байнаб. Бэеэ зүб абажа ябахын хажуугаар, архи, тамхи хэрэглэдэггүйб. Тиимэһээ намда үбдэхэ үбшэн гэжэ байдаггүй. Багшын ажал хээд, амаралтада гараһанай һүүлээр нэгэ хэды соо мал харааб. Харин мүнөө һамгантаяа Улаан-Баатарта ажаһуунабди. Долоон хоногтоо хоёр удаа хатарта ябадагбди. Энэмнайшье баһа илалта туйлаһандамни нүлөөлһэн байха, - гээд, Ц.Раднаа гуай тэмдэглэнэ.

Тэрээнһээ гадна Монгол Уласаа түлөөлэн, Азиин абарга шалгаруулха тэмсээндэ хабаадаһан 30-аад тамиршад сооһоо 5000 метрэй зайда Д.Ариунжаргал (40-44 наһанай бүлэг), А.Цогзолмаа (50 наһанай бүлэг), Д.Дамдинжав (60 наһанай бүлэг) тус тустаа шангай хоёрдохи һууринуудта гараа. Гадна балта шэдэлгээр алтан ба хүрэл медальнуудые Т.Цэрэндолгор абаа, үшөө нэгэ мүнгэн медальда уласхоорондын классай спортын мастер Ж.Түмэнжаргал хүртөө.

facebook.com/Лига монгольских народов сайтһаа гэрэл зураг абтаба