​​Тугшьегүйгөөр түлөөлхэ

Уласхоорондын Олимпиин хороон декабриин 9-дэ Ород гүрэнэй тамиршадые дүрбэн жэлэй хугасаада Олимпиин наадануудта, мүн бусад уласхоорондын мүрысөөнүүдтэ хабаадаха эрхэгүй гэһэн шиидхэбэри абаба.

Допингдо эсэргүүсэхэ талаар бүхэдэлхэйн агентствын (WADA) захилаар иимэ алхам хэгдээ гээд хэлэхэ хэрэгтэй. Һүүлэй хэдэн жэлдэ тус эмхи Ород гүрэнэй тамиршадые допинг хэрэглэнэ гэжэ зэмэлнэ. Энээнһээнь боложо, Ородой тамиршад 2018 оной үбэлэй Олимпиин наадануудта Олимпиин туг доро хабаадаа һэн гээд һануулая.

2020 ондо болохо Олимпиин наадануудта хэдэн буряад тамиршад хабаадаха аргатай. Нэн түрүүн, һур харбаашан Инна Степанова. 2019 оной дэлхэйн чемпионадта тэрэ Ксения Перова болон Елена Осипова гэгшэдтэй хамта Токио ошохо лицензитэй болоо һэн.

Барилдаагаар болон боксоор шэлэн абалгын мүрысөөнүүд үшөө үнгэргэгдэхэ. Тиигэжэ барилдаашад Стальвира Оршуш, Балдан Цыжипов, боксёрнууд Григорий Кушиташвили, Дарима Сандакова, Людмила Воронцова, Наталья Шадрина гэгшэд һайн дүнгүүдые харуулжа, Олимпиадада хабаадаха эрхэдэ хүртэхэл гээд һанагдана.

Буряадай Боксын федерациин түрүүлэгшын орлогшо, Арадай Хуралай һунгамал Валерий Доржиевай хэлэһээр, буряад тамиршад допинг хэрэглэдэггүй. Тиимэһээ тэдэ Токио ошохо аргатай. Юуб гэхэдэ, уласхоорондын Олимпиин хороон “сэбэр” тамиршадые шэлэн абаха. Тэрэ тоодо Буряадаймнай хүбүүд, басагаднай тугшьегүйгөөр, түрын дуулалшьегүйгөөр хамаагүй хабаадаха.

teamrussia.pro сайтһаа гэрэл зураг абтаба