​​Балдан Цыжипов шалгараа

Владикавказ хотодо гурбадахияа “Аланы” гэһэн томо уласхоорондын мүрысөөн декабриин 7-8-ай үдэрнүүдтэ үнгэргэгдэбэ. Эндэ Буряадай тамиршад хоёр медаль абажа шадаа.

2018 ондо тус мүрысөөндэ Ородой суглуулагдамал команда бүридхэгдөө һэн. Удаань тэндэ шалгарһан тамиршад “Гран-При Иван Ярыгин” гэһэн уласхоорондын мүрысөөндэ болон Европын чемпионадта хабаадаа бэлэй. Харин мүнөө тус мүрысөөндэ тиимэ шэлэн абалга болоогүй. Хэды тиигэбэшье, эндэ хабаадаха дуратайшуул үсөөрөөгүй. 25 гүрэнэй 235 тамиршад хибэс дээрэ гараа.

Буряадай түлөөлэгшэд сооһоо эгээл һайн дүн Балдан Цыжипов харуулаа. 125 килограмм хүрэтэр шэгнүүртэ тэрэ шангай хоёрдохи һуури эзэлээ. Владикавказда Балдан Узбекистанай Сухробжон Мукарамовые (11-0), Дагестанай Магомедгаджи Нурасулов (3-1), Шамиль Шарипов (7:0) гэгшэдые шүүжэ гараа. Финальна уулзалгада Хойто Осети- Алани Уласай Батраз Газзаевта шүүгдэжэ, мүнгэн медальда хүртөө.

Энэ амжалтын удаа Балдан Цыжипов Олимпиадада ошохын түлөө шэлэн абалгын мүрысөөндэ хабаадаха яһала арга боломжотой болоо. Иигээд лэ һайн дүн “Гран-При Иван Ярыгин” гэһэн уласхоорондын мүрысөөндэ харуулбал, Ородой суглуулагдамал командын бүридэлдэ орожошье магадгүй.

70 килограмм хүрэтэр шэгнүүртэ Евгений Жербаев яһала һайнаар барилдажа байһан аад, хахад финалай уулзалгада бирагүйдөө. Дагестанай Рамазан Рамазановые шүүжэ байгаад, нюрган дээрэ хэбтэшөө. Гурбадахи һуури эзэлхын түлөө уулзалгада Кабардино- Балкари Уласай Анзор Ионовые диилэжэ, хүрэл медальда хүртөө.

65 килограммай шэгнүүртэ Даша Шарастепанов болон Булат Батоев гэгшэд табадахи һууринуудые эзэлһэн байна.