421
Буряадай тамиршан, велосипедээр урилдагша Марина Лиханова Ородой Холбоото Уласай кубогта хүртэхэ мүрысөөнэй 25 модоной зайда хубиин урилдаанда түрүүлжэ, алтан медальда хүртөө. Энэ зай Буряадай тамиршан 36:52,9 сагай болзорто гаталаа.
- Бүлэгөөрөө урилдаанда Марина Лиханова хүрэл медальда хүртөө. Тиихэдэ Ородой кубогта тамиршан басаган «критериум» гэһэн дүхэриг урилдаанда баһал гурбадахи һуури эзэлээ, - гэжэ Буряадай тамирай бэлэдхэлэй түбтэ тэмдэглээ.
Велоспорт-шоссе болон Ородой кубогта хүртэхэ бүхэроссиин мүрысөөн Ижевск хотодо сентябриин 1-һээ 3 болотор үнгэрөө.
Тиихэдэ үсэгэлдэр, сентябриин 6-да, Ижевск хотодо Ородой Холбоото Уласай чемпионадай хоёроороо урилдаан үнгэргэгдөө. 25 модоной зайда Марина Лиханова Үбэр Байгалай хизаарай Екатерина Маломуроватай хамта паарна урилданда гурбадахи һуури эзэлжэ, хүрэл медальда хүртөө.
Фото: instagram.com/csp_03/
