​Буряадай санашанда үбэлэй хаһа эхилбэ

Буряадай санашан Алиса Жамбалова энэ үдэрнүүдтэ Финляндиин Муонио хотодо һорилго хэжэ байнхай. Эгээл эндэ Ородой суглуулагдамал команда 2020-2021 онуудай үбэлэй халаанда бэлэдхэлээ түгэсэхэнь.

Үбэлэй халаанда Ородой санашад заншалта ёһоороо дүрбэн бүлэгтэ хубааран бэлэдхэл хэһэн байна. Тиигэжэ Алиса Жамбалова немец һоригшо Маркус Крамерай ударидалга доро хүдэлөө. Мүнөө бүхы санашад һүүлшынгээ һорилго сугтаа үнгэргэнэ.

Ноябриин 15-да һорилгын урилдаанда 5 километр зайдада долоон гүрэнүүдэй эхэнэрнүүд мүрысөө. Эндэ Ородой Наталья Непряева шалгараа. Мүн Алиса Жамбалова тэрээнһээ 54 секундээр хойнтожо ерээ.

Ноябриин 20-21-дэ мүрысөөнэй удаа Дэлхэйн Кубокто хабаадаха тамиршадай нэрэ элирүүлэгдэхэ.