​Ородой мүрысөөндэ Буряадай тхэквондистнууд түрүүлээ

Үни удаанай хүлеэгдэһэн Ородой чемпионат одоошье үнгэрэгдэбэ. Буряадай тхэквондистнууд бүхы дээрээ 20 медаль абажа шадаа гэжэ Буряад Уласай спортын болон залуушуулай хэрэгүүдэй яаман мэдээсэнэ. 

Московско можын Одинцово хото 39 можо хизаарнуудай 750 гаран тамиршадые угтан абаа. Үхибүүдэй дунда хэдэн наһанай бүлэгтэ, мүн ехэшүүлэй дунда шанга гэгшын тулалдаануудта тэдэ оролсоо. Заншалта ёһоороо Буряадай тхэквондогой эблэлэй гэшүүд һайн дүнгүүдые харуулаа. Найман алтан, зургаан мүнгэн болон зургаан хүрэл медальнуудтай тамиршаднай гэртээ үсэгэлдэр бусаа.

Эгээл бага наһатай тхэквондистнуудай дунда Илья Кречет болон Анзана Дансарунова гэгшэд түрүү һууринуудые эзэлһэн байна. Эдиршүүлэй дунда Фёдор Девянин нэгэдэхи һуурида гараа. Залуушуулай дунда чемпионой нэрэ зэргэдэ Иван Багулов, Евгений Фаткулин болон Антон Шмаров гэгшэд хүртөө. Ехэшүүлэй дунда ганса Алёна Манзарова түрүүлээ.

Шангай һуури эзэлэгшэдэй дунда Буряадай түрүү тамиршад эзэлһэниинь һайшаалтай. Эдэ хэд бэ гэбэл, Дмитрий Петухов болон һоригшо Владимир Николаев гэгшэд болоно.

Энэ мүрысөөнэй дүнгүүдээр Ородой суглуулагдамал команда бүридхэгдөө. Ерэхэ, 2021 ондо тэдэ уласхоорондын мүрысөөнүүдтэ хабаадаха эрхэдэ хүртөө. Тэрэ тоодо Буряадай дүрбэн тамиршан Иван Багулов, Дмитрий Петухов, Антон Шмаров болон Екатерина Локтева оруулагдаһан байна.