​Буряадай баскетболист басагад шалгараа

2008 ондо түрэһэн Буряадай басагад регион хоорондын мүрысөөндэ амжалта туйлажа, өөрын наһанай бүлэгтэ Ородой чемпионадтай хахад финалай шатада хабаадаха эрхэдэ хүртөө.

Улаан-Үдэ хотын 5-дахи спортын һургуулиин шабинар Буряадые түлөөлөө гээд хэлэлтэй.

Энэ наһанай бүлэгтэ Ородой 38 можо хизаарнуудай команданууд наадахабди гэжэ түрүүн мэдүүлгэ оруулһан байна. Теэд тохёолдоһон оршон байдалһаа боложо, 4-иинь наадануудта оролсоо.

Новосибирскэ можын Бердск хотодо оройдоол гурбан команда ерээ. Сибирь болон Алас Дурна зүгэй федеральна тойрогуудай дунда мүрысөөндэ һонирхол татама нааданууд болоо гээд хэлэлтэй. Мүрысөөнэй түгэсхэлдэ Улаан-Үдэ, Омск болон Новокузнецк хотонуудай басагад тон адли очконуудые абаһан байна. Энэ ушарта нэмэлтэ тоололгын удаа Буряадай баскетбол наадагшад 1-дэхи һуури эзэлээ гэжэ элирээ.

Мүрысөөнэй удаадахи шата 2021 оной эхиндэ болохоор хараалагдана