​Улаан-Үдын спортын һургуули гүрэнэй шанда хүртөө

Суута барилдаашан Геннадий Манжуевай нэрэмжэтэ Олимпиин халаанай спортын 10-дахи һургуули «Российские организации, дружественные к детям» гэһэн гаршагтай гүрэнэй үндэһэтэнэй шанда хүртэбэ. Буряад Уласай спортын болон залуушуулай хэрэгүүдэй талаар яаманай хэблэлэй албан энэ баяртай мэдээсэл һаяхана дуулгаба.

Хүүгэдые амаруулдаг эмхи зургаанууд, спортын һургуулинууд, нэмэлтэ һуралсалай эмхинүүд гүрэнэй үндэһэтэнэй шанда хүртэһэн байна. Бүхы дээрээ 50 можо хизаарнуудай 115 эмхи шан абаха болоо.

Геннадий Манжуевай нэрэмжэтэ Олимпиин халаанай спортын 10-дахи һургуулида барилдаашадые болон һур харбагшадые бэлдэдэг юм. 1993 онһоо хойшо олон тоото мэдээжэ тамиршад эндэһээ урган гараа. Тэдэнэй тоодо Сурдлимпиин наадануудай абарга Григорий Кожевников, 2012 оной Олимпиин наадануудай хүрэл медальда хүртэгшэ Любовь Волосова, 2016 оной Олимпиин наадануудай мүнгэн медальда хүртэгшэ Инна Степанова гэгшэдые нэрлэмээр.