​Түрүүшынгээ нааданда “Бурятия” команда шүүгдээ

Һайн дуратанай командануудай дунда футболоор Ородой чемпионадай түгэсхэлэй шатада хабаадажа байһан “Бурятия” команда түрүүшынгээ наада үнгэргэбэ.

Ноябриин 22-то тэдэ Москва хотын «Росич» командатай наадаа. Ородой ниислэлэй футболистнууд энэ нааданда 5:2 гэһэн тоотойгоор илалта туйлаһан байна. Нааданай эхиндэ “Росич” командын гэшүүн түрүүшын бүмбэгэ Улаан-Үдын футболистнуудай бартаа руу сохижо оруулба. Удангүй Буряадай Алексей Рябованов 11 метрһээ тоо 1:1 болгобо.

Нааданай 2-дохи хахадай эхиндэ Москвагай команда дахинаа урагшаа гараба. 71-дэхи минутада Евгений Корнаков табло дээрэхи тоо 2:2 болгоһон байна. Һүүлшын 15 минутада “Бурятия” команда эсээ юм гү, аяар гурбан бүмбэгэ өөрын бартаа руу алдаба.

Финалай “А” бүлэгтэ “Бурятия” команда һүүлшын 5-дахи һуури эзэлнэ. Удаадахи наадаяа тэдэ ноябриин 24-дэ Сахалинай можын “Ноглич” командатай үнгэргэхэ. Зүүн зүгэй команда 2019 оной финалда шангай 3-дахи һуури эзэлһэн габъяатай.