​Дэлхэйн рекордсмен Буряадта ажаһууна

Гиир үргэлгөөр дэлхэйн чемпионадта Буряадай тамиршад ялас гэмэ амжалта туйлажа, найман медальтай гэртээ бусахань. Гэхэтэй хамта, Андрей Рассадин бүхэдэлхэйн рекорд харуулба.

 Мүнөө жэлэй дэлхэйн чемпионат Санкт-Петербургдэ үнгэргэгдэһэн байна. Эндэ ганса ехэшүүл бэшэ, мүн залуушуулай, ветерануудай дунда мүрысөөн болоо. Тус хэмжээ ябуулгада 15 гүрэнэй 300 гаран тамиршад помост дээрэ гаража, бэлиг шадабарияа харуулаа.

“Двоеборье” гэһэн шэглэлдэ чемпионой нэрэ зэргэдэ Андрей Рассадин хүртөө. Тэрэ хүндэ гиир 335 дахин үргэжэ шадаа. Энэнь дэлхэйн рекорд боложо үгөө.

Буряадай суута тамиршан Сергей Леонов оло дахин дэлхэйн рекорд өөрын нэрэтэ болгоһон байна. Тэрээнэй һүүлдэ Буряадай тамиршад иимэ үндэр дүн харуулаагүй, дэлхэйн рекорд табяагүй байгаа бшуу. Мүнөө үедэ Сергей Леонов гиир үргэлгын бүхэроссиин федерациин хүтэлбэрилэгшын орлогшоор хүдэлнэ. Тэрэ эгээл түрүүн Андрей Рассадиные амаршалаа.

Мүнгэн медальнуудые Василий Недорезов, Сергей Каргин болон Сергей Любимский гэгшэд абаһан байна. Хүрэл медаляар Дмитрий Коломин шагнагдаа.

Сергей Каргин хадаа үшөө залуушуулай дунда мүрысөөндэ шалгаржа, түрүүлжэ гараа.

Мэргэжэлтэ тамиршадай хажуугаар өөрын мүрысөө ветеранууд болон һайн дуратан үнгэргэһэн байна. Эндэ баһа Буряадай тамиршад шалгараа. Александр Усольцев болон Валерий Карпов гэгшэд нэгэдэхи һууринуудые эзэлээ.