​Арбаледээр буудадаг Буряадай мэргэшүүл шалгараа

Матчева арбаледээр буудалгаар Ородой чемпионадта Буряадай тамиршад эрхимлэһэн байна. Мүрысөөн Московско можын Коломна хотодо үнгэрэгдөө.

Арбаледээр буудалга Буряад орондо яһала хүгжэнги. Тамиршаднай холо ойгуур уласаа суурхуулна. 2015 ондо Улаан-Үдэдэ дэлхэйн чемпионат болоо һэн гээд һануулая.

10 метрэй хугасаада арбаледээр буудалгада 50 гаран хүн хабаадаба гээшэ. Тэдээн сооһоо Буряадай тамиршад эрхимлээ. Эдиршүүлэй дунда түрүү һуури Анастасия Деревягина эзэлжэ шадаа. Екатерина Бубенцова хоёрдохи һуури эзэлхынгээ хажуугаар “Ородой спортын мастер” гэһэн үндэр нэрэ зэргэдэ хүртөө.

Екатерина Бубенцова, Анастасия Деревягина болон Анна Енисеева гэгшэд Буряад Уласые командна тоосоондо 1-дэхи һуурида гаргаа.

Ехэшүүлэй дунда Валентина Протасова шангай 2-дохи һуури эзэлһэн байна. Үшөө ехэшүүлэй дунда буудаһан Анастасия Деревягина болон Екатерина Бубенцова гэгшэд Валентина Протасоватай хамта командна тоосоондо мүнгэн медаляар шагнагдаа.

Валентина Протасовагай зураг.