​Үндэр наһатай тамиршан Буряадаа суурхуулна

Хүнгэн атлетикын бүхэроссиин федераци 2020 оной эрхим тамиршадай нэрэнүүдые нэрлэбэ. Үндэр наһатай атледүүдэй дунда Буряадай Геннадий Мармушев эрхим гэжэ элирээ.

Ветерануудай дунда 10 гаран хабаадагшадай дундаһаа алинииншье түрүүлхэ аргатай байгаа. Дуугаа үгэлгэдэ Буряадай тамиршан һүүлшын шатада Тольятти хотын Николай Михайловые шүүжэ гараа.

72 наһатай Геннадий Мармушев Хяагта хотоһоо уг гарбалтай юм. 32 жэлэй хугасаада сэрэгэй алба хааһан байна. СССР-эй спортын мастер гэһэн хүндэтэ нэрэ зэргэдэ хүртэһэн намтартай. 2020 ондо бүхы хабаадаһан мүрысөөнүүдтэ эрхимлэжэ гараа. Ородой чемпионадта, Ородой кубокта, Найрамдалай кубокта заал һаа алтан медальнуудта хүртөө. Мүн Красноярскын болон Новосибирскын хахад марафондо илалтануудые туйлаа.