374
Оренбург хотодо үнгэрһэн амаралтын үдэрнүүдтэ боксоор эрэшүүлэй дунда Ородой чемпионат эхиеэ абаба. Буряад Уласые түлөөлжэ байһан зургаан тамиршадай гурбаниинь түрүүшын хоёр үдэртэ шүүгдэжэ, гэртээ бусахань.
Ородой чемпионадта бүхы дээрээ 309 тамиршан хабаадана. Эгээл олон хүн 75 килограммай шэгнүүртэ суглараа, эндэ чемпион болохын түлөө 39 боксёр тэмсэнэ. 21 хүн 49 килограммай шэгнүүртэ оролсоо.
Буряадһаа зургаан хүн хабаадажа, түрүүшын хоёр үдэртэ гурбаниинь шүүгдэжэ үрдеэ.
49 килограммай шэгнүүртэ Николай Харанахоев Башкортостанай түлөөлэгшэ Артур Мухтаровта диилдээ. 63 килограммай шэгнүүртэ Доржо Дахаев Воронеж хотын Сергей Корольтой уулзажа, шүүгдөө.
52 килограммай шэгнүүртэ Баир Батлаев хоёр уулзалга үнгэргөө. Түрүүшын үдэр Ханты-Мансийскын Никита Устиновые шүүжэ, удаань дэлхэйн чемпионадай мүнгэн медальда хүртэһэн Саха-Яхад Уласай Василий Егоровые илажа шадаагүй.
Үсэгэлдэр, ноябриин 29-дэ, Радна Цыбиков түрүүшынгээ илалта туйлаа. Тэрэ Дагестанай Анзор Гапуевые шүүжэ шадаа. 60 килограммай шэгнүүртэ шаалсадаг Радна ноябриин 30-да ээлжээтэ уулзалгаяа Санкт-Петербург хотын Дмитрий Кружковтой үнгэргэхэ.
Мүнөөдэр түрүүшынгээ уулзалга Альберт Гатаулин үнгэргэхэ. Тэрэ Удмурт Уласай Максим Чернышовтой шаалсаха.
Декабриин 1-дэ түрүүшынхиеэ ринг дээрэ Батор Сагалуев гараха. Башкортостанай Артур Мухтаровые шүүжэ, нютагайнгаа хүбүүн Баир Батлаевай түлөө үһөөень абахаа оролдохо.
Автор: Борис БАЛДАНОВ
Фото: Ородой чемпионат эмхидхэгшэдэй зураг
