​Шэнэ халаанай Дэлхэйн кубокта Буряадай Алиса Жамбалова хабаадана

Финляндиин Рука гэһэн хадаһаа һолжоролгын курортын дэргэдэ Дэлхэйн кубокта хүртэхын түлөө мүрысөөнэй 1-дэхи шата ноябриин 27-29 үдэрнүүдтэ үнгэргэгдэбэ. Буряадай санашан Алиса Жамбалова урдахи жэлнүүдтэл адли өөрын шадалаараа дүн харуулаа.

Нэгэдэхи үдэр болоһон спринт урилдаанда Алиса бираггүйдөө. Аяар холын 56-дэхи һуурида гаража, финалда гаража шадаагүй.

Хоёрдохи үдэрынь түрүүшынхиһээ яһала һайн байба. 10 километр зайда классическа аргаар урилдаанда Алиса Жамбалова 32-дохи дүн харуулжа шадаа.

Урда үдэртэнь хэн хэдытэхи һуури эзэлээб, тэрэл ээлжээгээрээ удаадахи урилдаанда гарадаг дүримтэй. Тиигэжэ 10 километр зайдые сүлөөтэ аргаар урилдаанда Алиса Жамбалова эрхим 30 тоодо оролсоо. Дэлхэйн кубогой хубиин тоосоондо Алиса түрүүшынгээ 4 очко абаба.

Гурбан үдэрэй туршада үнгэргэгдэһэн урилдаануудта Ород гүрэнэй санашад гурбан мүнгэн, нэгэ хүрэл медальнуудые абаа. Александр Большунов хоёрдохи болон гурбадахи һууринуудые эзэлээ. Алексей Червоткин болон Татьяна Сорина гэгшэд нэгэ-нэгэ мүнгэн медальнуудта хүртөө.

Дэлхэйн кубокта хүртэхын түлөө мүрысөөнэй 2-дохи шата Швейцариин Давос хотодо декабриин 12-13 үдэрнүүдтэ болохоор хараалагдана.