​Буряадай Батор Сагалуев түрүүшынгээ уулзалгада диилээ

Декабриин 1-дэ Ородой чемпионадай ринг дээрэ Батор Сагалуев гаража, илалта туйлаба.

Ород гүрэнэй абарга, Европын наадануудай чемпион Батор Сагалуев Буряад тамиршад сооһоо эгээл һүүлдэ мүрысөөндэ хабаадажа эхилбэ. Тэрэ 49 килограммай шэгнүүртэ хабаадана.

Түрүүшын уулзалгада Башкортостан Уласай Артур Мухтаровтай Батор шаалсаа. Уфа хотын боксёр мүрысөөнэй түрүүшын үдэр Буряадай Николай Харанахоевые шүүһэн байна. Тиимэһээ Батор нютагайнгаа хүбүүнэй үһөөень абажа шадаа. Бүхы табан шүүгшэд Буряадай тамиршан эрхимлээ гэжэ шиидхэбэри гаргаа.

Декабриин 3-да 1/4 финалай шатада Новосибирск хотын Артыш Соянтай Буряадай тамиршан уулзаха.