Спорт 3 dec 2020 404

​Буряад угтай эдир шатаршан түрүүлээ

© фото: “Sahvski savez Beograda”

Ага тойрогһоо уг гарбалтай, мүнөө үедэ Улаан-Үдэ хотодо һорилго хэдэг эдир шатаршан Яна Жапова Сербидэ болоһон уласхоорондын мүрысөөндэ шалгараа.

“Трофей Белграда” гэһэн уласхоорондын мүрысөөн Белград хотодо 34-дэхиеэ эмхидхэгдээ. Мүнөө жэлэй сагаан-хара хюлгын саана 50 гаран тамиршан тулалдаа.

12 наһатай Яна Жапова һүүлшын шата болотор шангай һуурида гараха аргатай байгаа. 9-дэхи турта тэрэ Македониин Эмиль Растецки гэгшэтэй наадажа шүүгдөө. Македониин түлөөлэгшэ 1-дэхи һуури эзэлһэн байна.

Иигээд лэ Яна 5,5 очко абажа, 9-дэхи һуурида гараа. Харин эхэнэрнүүдэй дунда тэрэ чемпионой нэрэ зэргэдэ хүртөө. Уласхоорондын мастерай нэрэ зэргэдэ хүртэхын түлөө гурбан балл  дүүргэдэг юм. Тус мүрысөөндэ Яна түрүүшын балл абажа шадаа. Тиихэдэнь ФИДЕ-гэй рейтинг 2200 очкоһоо үлүү байха ёһотой.

Эдир тамиршан Улаан-Үдэдэ уласхоорондын мастер Тимур Ивановай ударидалга доро хүдэлнэ. Агын гимназида дистанционно аргаар һурадаг байна.

Автор: Борис БАЛДАНОВ

Фото: “Sahvski savez Beograda”