​Буряадай боксёрнууд бирагүйдөө

Оренбург хотодо үнгэргэгдэжэ байһан Ородой чемпионадта Буряадай тамиршад шангай һуурида гаража шадабагүй. 

Декабриин 2-то ринг дээрэ Радна Цыбиков гараа. Тэрэ 60 килограммай шэгнүүртэ Удмурт Уласай түлөөлэгшэ Оганес Снхчянтай уулзаба. Эндэ Ижевск хотын боксёр илалта туйлаа. Хэды тиигэбэшье, Радна Цыбиковай өөрын шэгнүүртэ эрхим 8 тамиршадай тоодо ороһониинь баярламаар.

Декабриин 3-да мүрысөөндэ хоёрдохи уулзалгаяа Батор Сагалуев үнгэргөө. Хэдэн жэлэй саада тээ Ородой чемпион болоһон Артыш Соянтай тэрэ тулалдаа. Артыш хадаа Новосибирскые түлөөлдэг юм. Баторшье Ородой чемпион болоһон гээд һануулая. Эгээл ехэ амжалтань хадаа Европын 1-дэхи наадануудта түрүүлжэ гараһаниинь болоно. Энэ уулзалгада Батор шүүгдэбэ гэжэ шүүгшэд шиидхэбэри гараа. Иигэжэ Батор эрхим 8 тамиршадай тоодо ороһониинь һайшаалтай.