​Буряадай барилдаашадай ори ганса амжалта

24 наһа хүрөөдүй тамиршадай дунда барилдаагаар Ородой чемпионадта Буряадай тамиршан Булат Баясхалонов шангай гурбадахи һуури эзэлһэн байна.

Энэ наһанай бүлэгтэ мүнөө жэлдэ дэлхэйн чемпионат болюулагдаа һэн. Хэды тиигэбэшье, Ородой эгээл түрүүшын чемпионат эмхидхэхэ тухай шиидхэбэри абтаа.

Смоленск хотын хибэс дээрэ 259 хүн гараа. Буряадые 25 тамиршан түлөөлжэ, оройдоол нэгэниинь шангай һуури эзэлжэ шадаа.

61 килограммай шэгнүүртэ барилдаһан Булат Баясхалонов декабриин 2-то хоёр дахин хибэс дээрэ гараа. Москвагай Арсенали Магомедовые 14:4 гэһэн тоотойгоор илалта туйлаад, удаадахи уулзалгада Тывагай Ай-Белек Монгушто 3:4 гэһэн тоотойгоор шүүгдэһэн байна. Тывагай түлөөлэгшын финалда гараһанай ашаар, Булат шангай һууриин түлөө барилдаха эрхэдэ хүртөө. Декабриин 3-да тэрэ Карачаево-Черкессия болон Хойто Осети Алани Уласуудые тамиршадые шүүжэ, хүрэл медальда хүртөө.

Никита Жаргалов 74 килограммай шэгнүүртэ 5-дахи һуурида гараһан байна.

Эрхүү можын буряад угтай Александр Балтуев 70 килограммай шэгнүүртэ 2-дохи һуури эзэлжэ, мүнгэн медаляар шагнагдаа.