​Улаан-Үдын эдир шатаршад хүршэ можонуудай тамиршадтай мүрысэбэ

Үхибүүдэй дунда хүршэ Улаан-Үдэ Шэтэ хотонуудай эдир шатаршадай дунда ээлжээтэ уулзалга һаяхана үнгэргэгдэбэ. Тус хэмжээн онлайн аргаар болоо.

Шанга гэгшын наадануудта 12 наһа хүрөөдүй тамиршад хабаадаа. Хэлсээнэй ёһоор, команда бүхэндэ зургаан хүбүүд, хоёр басагад наадаа. Роман Сымбелов, Алдар Тыхеев, Алдар Богданов, Булат Васильев, Артур Лесняк, Дамир Ивахинов, Вика Будаева болон Арьяна Жаргалова гэгшэд Буряадай ниислэлэй түлөө наадаа. Улаан-Үдын шатаршад хамта дээрээ 25,5 очко абаа. Мүн 33,5 очкотой шэтынхиид илалта туйлаа.

Буряад Уласай Арадай Хуралай һунгамал, эхэнэрнүүдэй дунда уласхоорондын гроссмейстер, шатарай федерациин хүтэлбэрилэгшэ Инна Ивахиновагай хэлэһээр, тус уулзалгые “Ростелеком” бүлгэм дэмжээ.

- Манай командын үхибүүдтэ нааданай удаа “Ростелеком” гарай бэлэгүүдые барюулаа. Тэдэ саашадаа эдир шатаршадые дэмжэхээр бэлэн байһанаа мэдүүлээ, - гэжэ Инна Ивахинова тэмдэглэнэ.

Зунай үедэ эдэ хоёр команданууд түрүүшынгээ уулзалга үнгэргөө бэлэй гээд һануулая.