552
Санкт-Петербург хотодо үнгэрhэн дэлхэйн чемпионадта Буряадай гиир үргэгшэд амжалта туйланхай. Россиин суглуулагдамал бүлэгтэ Буряадай 5 тамиршан орожо, тэдэнэр бултадаа медальнуудые шүүгээ. Арадай Хуралай дэргэдэ тамиршадые хүндэлэлын баяр ёhолол үнгэрөө.
16 жэлэй туршада буряадай гиревигууд дэлхэйн мүрысөөндэ алтан медальда хүртөөгүй байгаа юм. Һануулан хэлэхэдэ, Сергей Леонов тэрэ үедэ алта шүүгээ бэлэй. Тиигэжэ мүнөө, тэрэнэй шаби Андрей Рассадин түрүү hуури эзэлжэ шадаба. Тэрэ миин шүүгээ бэшэ мүн лэ дэлхэйн рекорд табяа. Тиихэдэ, Сергей Любимский, мүнгэн медальда хүртэнхэй. Юниорнуудай дунда Сергей Каргин эрхимлээ, мүн лэ hайн дураташуулай дунда Валерий Карпов түрүүлээ, ветерануудай дунда Александр Усольцев алтан медальда хүртэжэ шадаа.
Тамиршадай габьяа сэгнэшэгүй, омогорхомоор гэжэ хүндэлэлэй ёhололдо тэмдэглэгдээ. Гайхамаар үндэр амжалтанууд гэжэ Буряадай суглуулагдамал бүлэгэй ахамад тренер Андрей Рассадин хэлэбэ. Юуб гэхэдэ, Россиин чемпионадай hүүлдэ бултадаа коронавирусаар үбдөө бэлэйбди гэжэ тэрэ нэмэнэ hэн. Дэлхэйн чемпионадта бэлдэлгэдэ уласай гириин түб ехэ нүлөөтэй байба ха.
Баяр ёhололдо Россиин хүнгэн атлетикын ветеран, эрхим тамиршан Геннадий Мармушевые баhал арадай hунгамалнууд хүндэлөө. Тэрэ 71 наhатайшье hаа, Россиин болон уласхоорондын хэмжээнэй мүрысөөнүүдэй илагша мүн лэ призёр болоно. Элүүр энхэ бэетэй, хүсэ шадалтай тамиршан 2022 ондо Япони гүрэнэй Токио хотодо үнгэрхэ мүрысөөндэ хабаадаха зорилготой байhанаа мэдүүлнэ hэн. Баяр ёhололой дүнгүүдээр, арадай hангамалнууд бюджет соогоо нэмэлтэ оруулха тухай хэлсээ. Тиигэжэ мүрысөөнүүдтэ хабаадаха тамиршан- ветерануудай харгын гаргашада, мүн лэ байрлаха газарайн мүнгэн hомологдохо юм. Мүн лэ Онохой тосхоной гириин түбэй дэргэдэ зошод буудал баригдаха тухай түсэб хэлсэгдээ.
Фото: Буряад Уласай Арадай Хуралай мэдээсэлэй албан
