Буряадай һур харбаашад Шэтэдэ шалгараа

Шэтэ хотодо һур харбалгаар бүхэроссиин мүрысөөн түгэсэбэ. Буряадай тамиршад заншалта ёһоороо һайн дүнгүүдые харуулаа.

Заншалта мүрысөөн буряад угтай суута һур харбааша, Олимпиин наадануудай хүрэл медальда хүртэһэн, дэлхэйн абарга болоһон Владимир Николаевич Ешеевтэ зорюулагдаа.

Үбэлэй халаанда харбаашад түрүүшынхиеэ нюур нюураараа уулзаба. Хэды баярта мүрысөөн болобошье, олон тамиршад эндэ хабаадажа шадаагүйдэнь голхормоор. Бүхы дээрээ 107 хүн харбаһан байна.

Блочно түхэлэй һур номшоор харбалгада Сергей Шенхоров шангай 2-дохи һуури эзэлээ. Дарья Догарь хүрэл медаляар шагнагдаа. Мүн командна тоосоондо нэгэ мүнгэн, хоёр хүрэл медальда Буряадай тамиршад хүртөө. Дарья Догарь, Санжи Арамхиева, Лхама Жабон гэгшэд түрүү һуури эзэлхын түлөө тулалдаанда ЦСКА-гай командада шүүгдэшөө. Улаан-Үдэ хотын эхэнэрнүүд ( Валентина Базарова, Сарана Лумбунова, Радмила Шойдонова) болон Буряадай суглуулагдамал команда (Сергей Шенхоров, Александр Тармаков, Дмитрий Галсанов) шангай гурбадахи һуурида гараа. 

Классическа түхэлэй һур номшоор харбалгада Виктория Харитонова чемпион боложо тодороо. Эрэшүүлэй суглуулагдамал команда мүнгэн медаль абаа. Эрдэм Цыдыпов, Санжи Халудоров болон Василий Ринчино гэгшэд Буряадай түлөө харбаа. Эхэнэрнүүдэй командын түлөө харбаһан Виктория Харитонова, Чимита Лубсанова ба Номин Бальжинимаева гэгшэд гурбадахи һуурида гараа.

Декабриин 12 ба 19 үдэрнүүдтэ “Надежды России” гэһэн бүхэроссиин мүрысөөн онлайн аргаар үнгэрэгдэхөөр хараалагдана. Буряадай эдиршүүл тэндэ хабаадахаа бэлдэжэ байнхай.