621
Улаан-Үдын мэдээжэ һоригшо ябаһан Виктор Степанович Максимовай мүнхэ дурасхаалда зорюулагдаһан нээмэл мүрысөө шабинарынь эмхидхээ. Залуу шатаршан Эрдэм Хубукшанов бултаниие булижа шадаа.
Онлайн аргаар болоһон мүрысөөндэ 2005-2014 онуудта түрэһэн тамиршад хабаадаһан байна. Дэлхэйн 9 гүрэнэй болон Ородой 34 можо хизаарнуудай түлөөлэгшэд тулалдаануудта хабаадаха тухай мэдүүлгэ оруулжа, эмхидхэгшэдые гайхуулаа. Холын хабаадагшадай дунда Индонезиин 4 эдир наадагшадые болон США-гай 1 шатаршаниие тэмдэглэмээр.
Узбекистан гүрэнэй 14 наһатай уласхоорондын гроссмейстер Жавохир Синдаров болон Беларусь Уласай ФИДЕ-гэй мастер Денис Лазавик гэгшэд рейтингын эхиндэ байжа, эдэ хоёрой нэгэниинь түрүү һуури эзэлхэ гэжэ мэргэжэлтэд тэмдэглэн хэлээ. Энээнтэй зүбшөөгөөгүй Буряадай шатаршан Эрдэм Хубукшанов чемпионой нэрэ зэргэдэ хүртөө. Жавохир Синдаров болон тэрээнэй дүү хүбүүн Исломбек гэгшэд шангай һууринуудые эзэлһэн байна. Эрхим 10 шатаршадай тоодо Беларусь Уласай, Казахстан, Армени гүрэнүүдэй, Москва, Улаан-Үдэ, Азов хотонуудай түлөөлэгшэд орожо шадаа.
Басагадай дунда Курган, Уфа, Шэтэ хотонуудай наадагшад шангай һууринуудые эзэлээ.
Буряадай тамиршадай дунда Лев Сизов түрүүлһэн байна. Батор Жамбалов болон Влад Добшинов гэгшэд 2-3 һууринуудта гараа. Һоригшодой дунда Закаменск хотын Виктор Бадмажапов эрхим гэжэ нэрлэгдээ.
Автор: Борис БАЛДАНОВ
Фото: Буряад Уласай спортын болон залуушуулай хэрэгүүдэй яаманай сайтһаа
