​Буряадай гүрэнэй дээдэ һургуулиин тамирай факультет 60 жэлээ тэмдэглэбэ

Доржо Банзаровай нэрэмжэтэ Буряадай гүрэнэй дээдэ һургуулиин физкультурын, спортын болон аяншалгын факультет энэ үдэрнүүдтэ байгуулагдаһаар 60 жэлэйнгээ ойн баяр тэмдэглэгдэбэ.

Онлайн аргаар болоһон бүхэроссиин 2-дохи эрдэмэй-практическа конференци баярта ушарта зорюулагдаа. Нээлгын баяр ёһололой үедэ Ород гүрэнэй спортын яаманай сайд Олег Матыцинай баярай бэшэг дамжуулагдаа. Буряад Уласай спортын болон залуушуулай хэрэгүүдэй талаар яаманай сайд Вячеслав Дамдинцурунов мүн лэ амаршалаа.

60 жэлэй хугасаада факультет спортын 27 габъяата мастер, уласхоорондын классай 80 мастер, Ород гүрэнэй габъяата 34 һоригшые бэлдэн гаргаа. Дүүргэгшэд ганса спортын һалбарида ажал хэнэ бэшэ. Багшанар, хүсэтэ зэбсэгүүдэй хүдэлмэрилэгшэд, ниитын ажал ябуулагшад, политигууд, эрдэмтэд тэдэнэй дунда олон юм.

Эрдэм шэнжэлгын талаар ажалаа эршэдэхэ гэжэ хэлсээ. Тиихэдэ 2021 ондо тусхай музей байгуулхаар хараалагдаа.

Москва хотодо байдаг спортфак дүүргэһэн мэргэжэлтэд Улаан талмайда гаража, түрэл факультедээ ойн баяраарнь амаршалһан байна.