​Буряадай даамшад хүршэ Эрхүү можын нээмэл чемпионадай шангуудта хүртөө

Даам наадалгаар Эрхүү можын нээмэл чемпионат һургуулиин үхибүүдэй болон ехэшүүлэй дунда һаяхана үнгэрэгдөө. Буряадай тамиршад эндэ дүрбэн медаль абажа шадаа.

Онлайн аргаар болоһон мүрысөөндэ 13 можо хизаарнуудай 222 хүн хабаадаһан байна.

Эгээл бага наһатайшуулай (2013 онһоо бага) дунда Бэшүүр аймагай Владлен Корнев шангай гурбадахи һуури эзэлээ. Энэл наһанай бүлэгтэ Кабанск аймагай Селенгинск һууринай Софья Бабкина хоёрдохи һуурида гараа.

2008-2010 оной басагадай дунда Кабанск һууринай Елизавета Черных шалгаржа, түрүүлһэн байна. 2005-2007 оной басагадай дунда Аха аймагай Сорог һууринай Анжелика Шарастепанова чемпионой нэрэдэ хүртөө. Тэрэ Эрхүү можын түрүү даамшан Полина Шаракшиновае хүсэжэ гараа.