​Ханты-Мансиин тойрогые Буряадай шатаршан амаршална

Түргэн шатараар “Кубок Югры” гэһэн мүрысөөндэ Жамсаран Цыдыпов хабаадана.

Ородой Кубокта хүртэхын түлөө “РАПИД Гран-При России” гэһэн мүрысөөнэй һүүлшын шата тус хэмжээн болоно гээд хэлэлтэй. Ивалгын дасанда үнгэрэгдэдэг заншалта шатань мүнөө жэлдэ мэдээжэ шалтагаанһаа боложо болюулагдаа һэн гээд һануулая.

Декабриин 10-да түрүүшын 4 тур болоһон байна. Буряадай уласхоорондын гроссмейстер 3,5 очко абаад, 7-дохи һуури эзэлнэ. Бүхы дээрээ 84 шатаршан эндэ наадана.

Югра Ханты-Мансиин тойрог энэ үдэрнүүдтэ байгуулагдаһаар 90 жэлэйнгээ ой тэмдэглэнэ. Шатарай һайндэр гол хэмжээ ябуулгануудай нэгэн болоно.