Тайска боксоор Буряадай тамиршад абарга боложо тодороо

Нижегородско можодо болоһон бүхэроссиин хоёр томо мүрысөөнһөө Буряадай тамиршад 9 медальтай гэртээ бусахань.

Ехэшүүлэй дунда Ородой Кубокта хүртэхын түлөө мүрысөөн болон эдиршүүлэй дунда Ородой чемпионат 800 гаран тамиршадые суглуулаа. Буряад Уласые 17 тайска боксёрнууд тэндэ түлөөлһэн байна.

Эгээл бага наһатай тамиршадай дунда финальна уулзалгада Буряадай Дарья Ербаева ба Елизавета Бадмацыренова гэгшэд бэе бэетэеэ тулалдаһан байна. Эндэ Дарья чемпионой нэрэ зэргэдэ хүртөө. Екатерина Карнакова, Алина Гарасимова, Альбина Герасимова болон Илья Бекетов гэгшэд шангай гурбадахи һуури эзэлжэ, хүрэл медаляар шагнагдаа.

Ехэшүүлэй дунда Ородой Кубокта Буряадай хоёр тамиршад хүртэһэн байна. Уласай тайска боксын үнинэй түрүү зэргэдэ ябадаг Бато Бадархаев одоошье түрүүлжэ гараба. Эхэнэрнүүдэй дунда Кристина Новокрещенных 1-дэхи һуури эзэлжэ, Ородой Кубок дээрээ үргэбэ. Наталья Коростелева финалда орожо шадаад, мүнгэн медальда хүртөө.