​Буряадай шатаршан нэгэ сая түхэриг шүүхэ аргатай

Түргэн шатараар бүхэроссиин «РАПИД Гран-При России» гэһэн мүрысөөнэй финальна шата эхиеэ абаба. Эрхим 16 шатаршадай дунда Буряадай Жамсаран Цыдыпов наадана.

 Ханты-Мансийск хойно хойноһоонь гурбадахи томо мүрысөө угтан абажа байна. Эндэ дэлхэйн болон Европын шатарай тулалдаанууд болоһон түүхэтэй. Шалгарһан тамиршад 1 миллион түхэриг мүнгэнэй шан хубаажа абаха.

Түргэн шатарай мүрысөөндэ 16 тамиршан 15 наада бэе бэетэеэ үнгэргэхэ. Декабриин 15-да түрүүшын 5 тур болоһон байна. Буряадай уласхоорондын гроссмейстер түрүүшын нааданда Вологодско можын Александр Рахмановта шүүгдэшөө. Ехэ сухалаа хүрэжэ, удаадахи гурбан нааданда илалта туйлаа. Москвагай Александра Мальцевская, Новосибирскын Дмитрий Бочаров болон Москвагай Павел Понкратов гэгшэдые тэрэ илажа гараа. 5-дахи турта Москва хотын Борис Савченко гэгшэтэй тэнсээ.

Түрүүшын үдэрэй удаа 4 хүн тон адли 3,5 очко абанхай. Эдэ хэд бэ гэбэл, Павел Понкратов, Давид Паравян, Евгений Алексеев болон Жамсаран Цыдыпов гэгшэд болоно.

Декабриин 16-17 үдэрнүүдтэ мүрысөөнэй шанга тулалдаанууд үргэлжэлхэ.