​Алас Дурнын федеральна тойрогой мүрысөөндэ Буряадай санашад хоёр хүрэл медальда хүртөө

Южно-Сахалинск хотодо үнгэрһэн Алас Дурнын федеральна тойрогой мүрысөөндэ Буряад Уласай санашад хоёр хүрэл медальда хүртэһэн байна.

17-18-тай хабаадагшадай бүлэгтэ 66 тамиршад Ородой чемпионадта шэлэн абалгын шатада хабаадаа гээд хэлэлтэй. Табан үдэр үргэлжэлһэн мүрысөөнэй үедэ дүрбэн урилдаан эмхидхэгдээ.

Сэлэнгын аймагай Гусиноозёрск хотоһоо гарбалтай Виктория Невьянцева эгээл һайн дүнгүүдые харуулаа. Спринт урилдаанда болон 10 модоной зайда тэрэ 4-дэхи һууринуудые эзэлһэн байна. Мүн 5 километр урилдаанда Буряадай санашан шангай гурбадахи һуурида гараа. Хубиин тоосооной гурбан урилдаанда Хабаровска хизаарай Алёна Болонева түрүү һуурияа алдаагүй гээд нэмэхэ байнабди.

Мүрысөөнэй һүүлшын үдэр эстафетын урилдаан болоо. Виолетта Большакова, Маргарита Самарцева-Кузницына, Елизавета Никитина болон Виктория Невьянцева Буряад Уласые эндэ түлөөлөө. Хабаровска хизаарай болон Сахалинска можын басагадые тэдэ хүсэжэ шадаашьегүй һаа, шангай гурбадахи һуури эзэлһэн байна.

Маргарита Самарцева-Кузницына Буряадай гүрэнэй хүдөө ажахын академиин оюутан юм. Виктория хадаа Буряадай багшанарай колледжын 1-дэхи курсда һурадаг гээшэ. Булта тамиршад Сэлэнгын аймагай Гусиноозёрск хотоһоо гарбалтай юм. Мэдээжэ һоригшо Юрий Михайлович Куликовой ударидалга доро бэлэдхэл хэнэ.

Виктория Невьянцева үшөө 2020 ондо түрүүшынгээ амжалтануудые туйлаһан байна. Эрхүү можын мүрысөөндэ түрүүлээ. Тиихэдэ Сибириин федеральна тойрогой нээмэл мүрысөөндэ мүнгэн медаль абаа һэн.