​Буряадай тамиршан Кыргызстанда шалгараа

Үнгэрһэн долоон хоногой эсэстэ эмхидхэгдэһэн Кыргызстан гүрэнэй чемпионадта Арсалан Будажапов шангай гурбадахи һуури эзэлбэ.

Барилдаагаар Кыргызстанай чемпионат жэлэй эхиндэ эмхидхэгдэдэг заншалтай. Уласхоорондын мүрысөөндэ гүрэнөө хэн түлөөлхэб гэжэ тэндэ элирүүлэгдэдэг.

Арсалан Будажапов тус мүрысөөндэ хоёрдохи жэлээ хабаадана. 2020 ондо тэрэ 79 килограммай шэгнүүртэ түрүүлжэ гараа һэн. Харин мүнөө жэлдэ 74 килограммай шэгнүүртэ хабаадаха гэжэ шиидээ. Юуб гэхэдэ, энэмнай Олимпиин наадануудай бүридэлдэ оруулагдаһан шэгнүүр ха юм.

Бишкектэ болоһон мүрысөөнэй хахад финалай уулзалгада, Догдурбек уулу Эламан гэжэ тамиршанда Арсалан диилдэшөө. Удаань тэрэнь чемпион боложо тодороо. Тиигэжэ буряад хүбүүн хүрэл медаляар урмашуулагдаа. 

2021 оной апрель һарада Кыргызстанай барилдаашад Олимпиин наадануудта хабаадахын түлөө шэлэн абалгын шатада хабаадаха ёһотой юм. Теэд командын бүридэлдэ буряадай тамиршаниие тэдэ абаха гү, али үгы гэжэ мэдэгдэнэгүй.