Буряадай тамиршад Агада эрхимлээ

Үбэр Байгалай хизаарай Агын Буряадай тойрогой Ага  тосхондо 16 наһа хүрөөдүй тамиршадай дунда барилдаагаар Алас Дурна зүгэй федеральна тойрогой мүрысөөн һаяын үдэрнүүдтэ эмхидхэгдэбэ. Буряадай эдир барилдаашад 22 медальтай гэртээ бусаба.

Алас Дурна зүгэй бүхы можо хизаарнуудай барилдаашад Ага ерэһэн байна. Эгээл олон тамиршадые Буряад болон Саха-Яхад Уласууд эльгээгээ. Бүхыдөө 300-һаа дээшэ тамиршад хибэс дээрэ гараа гээд эмхидхэгшэд мэдүүлнэ.

Хүбүүдэй дунда тулалдаануудта Буряадай тамиршад хоёр алтан медальда хүртөө. Эрдэни Цыденжапов болон Ринчин Осоров хоёр өөр өөрын шэгнүүртэ чемпионууд боложо тодороо. Эндэ Саха (Яхад) Уласай барилдаашад дүрбэ дахин түрүүлһэн байна. Хибэсэй эзэд гурбан алтан медальнуудые абаа.

Буряадай басагад хүбүүдһээнь үлүү дүн харуулжа шадаа. Оксана Гараева, Даяна Мункуева, Оюна Сангадиева, Аяна Цыренжапова, Алина Хандажапова гэгшэд түрүүшын һууринуудта гараа.

Тус мүрысөөндэ шангай һуури эзэлһэн тамиршад Ородой чемпионадта хабаадаха эрхэдэ хүртөө. Хүбүүд апрель һарада Наро-Фоминск хотодо барилдаха. Барилдааша басагад Раменское хотодо мартын 15-18 үдэрнүүдтэ сугларха юм.