​Буряадай спортын сайд Вячеслав Дамдинцурунов үндэр хэмжээнэй мүрысөөнүүд тухай

Сагаан һарын түрүүшын үдэр Буряад Уласта барилдаагаар томо мүрысөөн эхиеэ абахань. Алас Дурна зүгэй федеральна тойрогой түрүү барилдаашад Улаан-Үдэдэ суглархань. Гаража байгаа үхэр жэлые барилдаанай тулалдаануудаар угтахада, тон удхатай гээд, Буряад Уласай спортын болон залуушуулай хэрэгүүдэй талаар сайд Вячеслав Анатольевич Дамдинцурунов тэмдэглэнэ.

2021 ондо Буряад Уласта үндэр хэмжээнэй мүрысөөнүүд олоор болохоор хараалагдана. Энээн тухай тамирай сайд дэлгэрэнгыгээр хөөрэжэ үгэбэ.

Шанга тулалдаануудта бэлэдхэл

Алас Дурна зүгэй федеральна тойрогой мүрысөөн Буряадай ниислэлдэ февралиин 12-14-эй үдэрнүүдтэ үнгэргэгдэхэнь. Тиишэнь харагшадые оруулхагүй гээд эмхидхэгшэд абаһаар лэ мэдүүлнэ.

- Буряадаймнай барилдаашад олоороо Ородой чемпионадта хабаадаха бэзэ гээд найданабди. Юуб гэхэдэ, манай тамиршад һайн бэлэдхэл гараа гээд һанагдана. “Барилдаанай Меккэ” гэһэн алдаршаһан Дагестан Уласай Хасавюрт хотодо мэдээжэ барилдаашад гурбан долоон хоногой эсэстэ бэлэдхэл январь һарада хээ, - гээд, сайд хэлэнэ.

Эрэшүүлэй дунда 10 шэгнүүртэ, эхэнэрнүүдэй дунда баһа 10 шэгнүүртэ эрхимүүд гурбан үдэрэй туршада элирүүлэгдэхэ. Түрүүлһэн тамиршад Ородой чемпионадта хабаадаха эрхэдэ хүртэхэ юм.

Мартын 10-15-ай үдэрнүүдтэ эрэшүүлэй дунда, майн 10-13- ай үдэрнүүдтэ эхэнэрнүүдэй Ородой гол мүрысөөнүүд Улаан- Үдэдэ үнгэргэгдэхэ юм. Тиимэһээ Алас Дурна зүгэй тулалдаанууд бэлэдхэлэй шата боложо үгэхэнь.

- Бидэ томо мүрысөөнүүдые үнгэргэхэ дүршэлтэйшье һаа, бүри һайнаар эмхидхэхэеэ, хүн зониие гайхуулхаяа шамданабди. Алас Дурна зүгэй мүрысөөндэ бүхы алхамуудаа хаража үзэхэбди. Хэн хаана байхаб, барилдаашад хаанаһаа хибэс дээрэ гарахаб, һоригшод хаагуур һуухаб, шүүгшэд яагаад алхалхаб гэхэ мэтэ юумэ шэнжэлэн харахабди, - гэжэ Вячеслав Дамдинцурунов мэдүүлнэ.

Билет миинтэ бэшэ

Эрэшүүлэй дунда СССР-эй чемпионат 1981 ондо түбэй стадион дээрэ үнгэргэгдөө бэлэй. 1990 ондо Улаан-Үдэдэ баһа СССР- эй чемпионат боложо, спортдо дуратайшуулые баярлуулаа һэн. Тэрэ гэһээр иимэ томо мүрысөө Буряадай харагшад үзөөгүй байна бшуу. 2020 ондо тулалдаанууд эмхидхэгдэхэ аад, муу оршон байдалһаа боложо үнгэргэгдөөгүй бшуу.

- Бидэ үнинэй иимэ томо мүрысөө эмхидхэхэ гэжэ түсэблэнэбди. Үүсхэлыемнай Буряад Уласай Засагай газар, манай Толгойлогшо Алексей Самбуевич Цыденов ехээр дэмжэнэ. Тэдэнэй ашаар лэ харюусалгатай хэмжээ ябуулгануудые үнгэргэхэмнай, - гээд, тамирай сайд хэлэнэ.

2019 ондо байдалай нэгэ бага һайн болоходонь, мүрысөө Владикавказ хотодо харагшадгүй эмхидхэхэеэ һанахадань, Хойто Алани-Осети Уласай тамиршад, һоригшод, спортдо дуратайшуул тон ехээр арсаа һэн. Тиихэдэнь тэндэхи мүрысөөн болюулагдаа бэлэй. Мүнөө жэлдэ Улаан-Үдэдэ болохо тулалдаануудта хүн зониие бага зэргэ оруулхаар хараалагдана.

- Буряадтамнай барилдаанда тон дуратай гэжэ мэдэнэбди. Харагшадгүй мүрысөө эмхидхэхэ аргагүйбди. Зал соо багтаха хүнүүдэй 50-70 хубииень оруулха тухай Роспотреб-хиналтын албантай хөөрэлдөөн боложо байна. Теэд тэрэ үедэ оршон байдалнай ямар байхаб гэжэ хаража үзэхэбдил даа, - гэжэ Вячеслав Анатольевич баяртай мэдээсэл дуулгана.

Ородой чемпионат хараха гэбэл, хүн зон үдэрэй тулалдаануудай түлөө 500 түхэриг гаргашалха болоно. Yдэшын программада финальна уулзалгануудые харахаяа һанабал, билет 1000 түхэригтэ байха.

Эрэшүүлэй дунда мүрысөөн 4 хоногой хугасаада болохо юм. Барилдаашад 10 шэгнүүртэ гурбан шэнэ хибэс дээрэ түрүүшүүлые элирүүлхэ.

- Мүрысөө үнгэргэлгэдэ маанадые Ородой Барилдаанай федераци бүхыгөөрөө дэмжэнэ, туһална. Уласхоорондын хэмжээнүүдые, илангаяа Олимпиин наадашье үнгэргэхэдэ хэрэгтэй барилдаанай зургаан хибэс тэдэ бэлэглэнэ. Гурбаниинь эрэшүүлэй чемпионадта хэрэглэгдэхэ, нүгөө гурбыень эхэнэрнүүдэй мүрысөөнэй үедэ дэлгэхэбди, - гэжэ Вячеслав Дамдинцурунов баярлаһанаа мэдүүлнэ.

Түрүү тамиршадай хабаадалгатайгаар

Буряадай спортын болон залуушуулай хэрэгүүдэй талаар сайд һаяхана Москва хотоор ябахадаа, бусад эмхидхэлгын асуудалнуудаар хөөрэлдөө эмхидхээ.

Һүүлэй үедэ томо мүрысөөнүүдэй Ородой холо можо хизаарнуудта үнгэргэгдэхэдэнь, түрүү тамиршад хабаадахагүй гэжэ оролдоно. Хэды тиигэбэшье удаань дэлхэйн гү, али Европын чемпионадта ябашоод барилдажа байхадань гайхалтай. Иимэ ушарнуудай олоор тохёолдодог болоһыень Буряадайшье спортдо дуратайшуул һайн мэдэнэ.

- Энэ асуудал Ородой Барилдаанай федерациин түрүүлэгшын 1-дэхи орлогшо Арсен Фадзаевай урда табяаб. Бүхы түрүү барилдаашад Улаан-Үдэ ерэхэл байха гэжэ тэрэ найдуулаа. Юуб гэхэдэ, мүнөө жэлдэ юрын лэ Олимпиин нааданууд болохоёо байна бэшэ. Сагайшье, байгаалииншье талаар зүүн зүгтэ үнгэргэгдэхэнь ха юм. Тиимэһээ Буряадта барилдажа, бэеэ туршабалнь, дутуу болохогүй. Мүн бүхы һорилгонуудаа тэдэ Алас Дурнада үнгэргэхөөр хараална, - гэжэ сайд өөрынгөө һанамжа хэлэнэ.

Һүүлэй мэдээгээр, түрүү тамиршад сооһоо ганса Абдулрашид Садулаев Буряадта барилдахагүй. Ород гүрэнэй суглуулагдамал командын һоригшод тэрэниие сэхэ Олимпиада ошохо гээд мэдүүлээ.

Гэхэ зуураа, 125 килограммай шэгнүүрэй хэдэн түрүү тамиршад баһа Улаан-Үдэдэ барилдахагүй гээд хэлэхэ хэрэгтэй. Юундэб гэхэдэ, мар­тын 19-21-эй үдэрнүүдтэ Олимпиин наадануудта шэлэн абалгын шата болохоор хараалагдана. Ород гүрэн ганса энэл шэгнүүртэ Олимпиадада ошохо эрхэгүй. Үшөө 5 шэгнүүртэхи путёвко тэдэ 2019 оной дэлхэйн чем­пионадта абанхай.

Буряадаймнай түрүү тамиршад Александр Богомоев, Евгений Жербаев, Балдан Цыжипов, Даша Шарастепанов өөһэдынгөө харагшадай урда һайн барилдаа харуулжа, шангай һууринуудые эзэлжэ, чемпионууд болоһой гэжэ харагшад найдана.

- Булта барилдаашадтай хөөрэлдөөбди. Хэн хайшан гээд барилданаб гэжэ һоригшод булта ойлгожо байна. Тэрэ болотор тэнхээ тамирыень дээшэлүүлхэ гэжэ оролдохо. Хэдэн медальнуудые, илангаяа алтан зүһэтэйе абахаб гэжэ түсэблэбэлнай, хибэс харуулха, - гэжэ Вячеслав Дамдинцурунов тобшолно.

2019 ондо боксоор болоһон дэлхэйн чемпионадтал мэтэ һайн дуратайшуул мүрысөөнэй үедэ хүдэлхэ, харагша бүхэндэ анхарал хандуулагдаха.

Эхэнэрнүүдэй тулалдаан

Майн 10-13-ай үдэрнүүдтэ Ородой түрүү барилдааша басагад Улаан- Үдэдэ дахинаа сугларха. Һүүлэй 18 жэлдэ Буряадай ниислэлдэ Ородой чемпионат дүрбэдэхиеэ болохонь гээд һануулая.

Мүнөө жэлдэ тус мүрысөөн Олимпиин наадануудта шэлэн абалгын хоёр шатын һүүлээр болохо юм. Тиимэһээ Токиодо Ородой хэды басагад хибэс дээрэ гараад байхаб гэжэ эли болоод байха. Ородой суглуулагдамал командын һоригшод тэндэ ошохо барилдаашадые Ородой чемпионадһаа сүлөөлжэшье болохо. Хэды тиигэбэшье ургажа ябаа залуу тамиршад, амжалтануудаа мартаад ябаһан барилдаашад эндэ бэеэ харуулха гэжэ оролдохол байха.