​Шатарай хуралдаан Буряадта эмхидхэгдэхэгүй

Мартын 10-13-ай үдэрнүүдтэ Ивалгын дасанай дэргэдэ түсэблэгдэһэн шатарай хуралдаан үнгэргэгдэхэгүй гэһэн мэдээсэл абтаба.

Үшөө 2000 онуудай эхиндэ 1 дүгээр Бандида Хамбо лама Даша-Доржо Заяевай нэрэмжэтэ буддын шажанай дээдэ һургуулиин шангуудта хүртэхын түлөө уласай мүрысөөн эмхидхэгдэжэ эхилээ һэн гээд һануулая.

2010 ондо тус хэмжээ ябуулга бүхэроссиин хэмжээнэй болгогдоо бэлэй. Түргэн шатараар “РАПИД Гран При России” гэһэн Ород гүрэнэй Кубогта хүртэхын түлөө мүрысөөнэй нэгэ шата эндэ эмхидхэгдэжэ эхилээ.

600 гаран шатарта дуратайшуулые нэгэ доро суглуулжа, эгээл олон хабаадагшадтай шатарай мүрысөөн гэжэ Ород гүрэндэ тоологдодог болонхой. Мүн тиихэдэ уласхоорондын 20 гаран гроссмейстер Ивалгын дасанда ерэжэ, мүрысөөндэ бүри һонирхол татуулжа байгаа.

Хоёрдохи жэлээ удаа дараалан тус хэмжээ ябуулга болюулагдахадань харамтай гээд Ородой шатарай федераци мэдүүлнэ.

“РАПИД Гран При России” гэһэн Ород гүрэнэй Кубогта хүртэхын түлөө мүрысөөн мүнөө жэлдэ хэдэн шатаһаа бүридэнэ. Эндэ түрүүлһэн 14 шатаршан финалда гаража, түрүү һуури эзэлэгшые элирүүлхэ.