​Буряад барилдаашан Арсалан Будажапов Киевтэ мүрысэхэ

Кыргызстан гүрэнэй түлөө барилдадаг Арсалан Будажапов Украинада үнгэргэгдэхэ мүрысөөндэ хабаадаха эрхэдэ хүртэбэ.

Украинын суута барилдааша болон һоригшодто зорюулагдаһан уласхоорондын мүрысөөн февралиин 26-28-ай үдэрнүүдтэ үнгэргэгдэхэнь. 20 гаран гүрэнэй тамиршадай тоодо хибэс дээрэ Кыргызстанай суглуулагдамал командын гэшүүд гараха юм.

74 килограммай шэгнүүртэ түрүү һуури эзэлхын түлөө Арсалан Будажапов мүрысэхэ. Энэл шэгнүүртэ Кыргызстанай чемпион Эламан Догдурбек уулу барилдаха юм. Эдэ хоёрой хэниинь һайн дүн харуулааб, тэрэниинь Олимпиин наадануудта шэлэн абалгын мүрысөөндэ хабаадаха эрхэдэ хүртэхэ. Азиин гүрэнүүдэй түлөөлэгшэд апрель һарада Казахстанда сугларха.