​Буряадай барилдааша басагад Италида мүрысэхэнь

Мартын 5-7-ой үдэрнүүдтэ Италида "Маттео Пелликоне" гэһэн уласхоорондын мүрысөөн үнгэрэгдэхэнь. Тэндэ Буряадай тамиршад барилдахаар хараалагдана. 

Дэлхэйн чемпионадта гурба дахин мүнгэн медальда хүртэһэн Ирина Ологонова 57 килограммай шэгнүүртэ хибэс дээрэ гараха. Буряад Уласые түлөөлдэг чуваш угтай тамиршад Вероника Чумикова болон Евгения Захарченко барилдаанда хабаадаха.

Бүхыдөө эхэнэрнүүдэй Ородой суглуулагдамал командын бүридэлдэ 20 хүн оруулагдажа, Итали ошонхой. Олимпиин наадануудта ошохын түлөө шэлэн абалгын мүрысөөндэ хэн барилдахаб гэжэ олон шэгнүүртэ үшөө мэдэгдэнэгүй. Тиимэһээ иимэ олон Ородой тамирша басагад тус уласхоорондын мүрысөөндэ хабаадана гээд һанагдана. Европын гүрэнүүдэй дунда шэлэн абалгын мүрысөөн мартын 18-21-эй үдэрнүүдтэ Будапешт хотодо болохоор түсэблэгдэнхэй.