​Буряадай Яруунын аймагай барилдаашад шалгараа

Буряадай Яруунын аймагай барилдаашад Ананда Дашиев Эрдэм Будажанаев хоёр гүрэнэй хэмжээнэй мүрысөөнүүдтэ амжалта туйлаа. Ананда Дашиев Ага тосхондо үнгэргэгдэһэн сүлөөтэ барилдаагаар Бүхэроссиин турнирта  илажа гараа. Буряадай гүрэнэй дээдэ һургуулиин оюутан сүлөөтэ барилдаагаар Ородой Холбоото Уласай мастерай норматив дүүргээ.

Яруунаһаа гарбалтай Эрдэм Будажанаев эрэшүүлэй дунда үнгэргэгдэһэн сүлөөтэ барилдаагаар Алас Дурнын федеральна тойрогой мүрысөөндэ хоёрдохи болоо. Энэ амжалтын ашаар залуу тамиршан сүлөөтэ барилдаагаар Ородой чемпионадта хабаадаха эрхэдэ хүртөө.