​Сэнтэй алтан: Буряадай тамиршад Дарима Сандакова Елена Гапешина хоёрой амжалта

Турци гүрэндэ үнгэргэгдэһэн боксоор уласхоорондын мүрысөөндэ Буряадай тамиршад Дарима Сандакова болон Елена Гапешина гэгшэд шалгараа.

Ородой суглуулагдамал команда Олимпиин наадануудта ошохын түлөө шэлэн абалгын шатада бэлдэжэ байнхай. Үшөө 2020 оной эхиндэ ехэ түсэб табигдажа, табан шэгнүүртэ 3-4 эрхим тамиршан шэлэгдээ һэн. Энэ түсэбэй ёһоор бултыень уласхоорондын мүрысөөнүүдтэ хабаадуулжа шалгана.

Босфор хоолойн эрье дээрэ болоһон мүрысөөндэ 18 гүрэнэй 74 эхэнэр хабаадаһан байна. Эндэ Ородой суглуулагдамал командын гэшүүд гурбан алтан, нэгэнэгэ мүнгэн ба хүрэл медальнуудые абажа шадаа.

Мухар-Шэбэрэй аймагһаа гарбалтай Буряадай тамиршан Дарима Сандакова 69 килограммай шэгнүүртэ ринг дээрэ гараа. Польшо, Марокко, Кабо-Варде болон Аргентина гүрэнүүдэй тамиршадые шүүжэ, алтан медаляар шагнагдаа.

Севастополь хотодо үндыһэн, мүнөө үедэ Буряад Уласай “Номто” гэһэн спортын клубай гэшүүн Елена Гапешина мүнөөдэртөө һайн бэлэдхэлтэй байһанаа гэршэлээ. 75 килограммай шэгнүүртэ тэрэ гурбан илалта туйлажа, чемпион боложо тодорһон байна.

Ородой тамиршан Дарья Абрамова Турцида түрүүлээ. Анастасия Белякова шангай 2-дохи һуурида гараа. Хүрэл медаль Анастасия Шамонова абаһан байна.

- Мүнөө үедэ манай командын тамиршад гэр гэртээ тарахань. Апрелиин 20-до “Озеро Круглое” гэһэн һорилгын комплексдо суглархабди. Май һарада Чехидэ болон Хабаровск хотодо эмхидхэгдэхэ уласхоорондын мүрысөөнүүдтэ басагаднай хабаадаха. Июниин 4-8-ай үдэрнүүдтэ үнгэргэгдэхэ шэлэн абалгын мүрысөөндэ хабаадахаяа Париж ябахабди, - гэжэ Ородой суглуулагдамал командын ахамад һоригшо Игорь Шидловский түсэбөөрөө хубаалдана.

2019 ондо дэлхэйн чемпионадта мүнгэн медальда хүртэһэн Буряадай тамиршан Людмила Воронцова суглуулагдамал командын бүридэлдэ ородог гээд һануулая.