​Буряадай эдир самбо барилдаашад Алас Дурнада шалгараа

Владивосток хотодо үнгэргэгдэһэн Алас Дурна зүгэй федеральна тойрогой мүрысөөндэ Буряадай тамиршад найман медальда хүртэһэн байна.

14-16 наһатай тамиршад хибэс дээрэ гараа. Алас Дурнын 11 можо хизаарай 240 гаран тамиршадай дунда Ородой чемпионадта хабаадаха самбо барилдаашад элирүүлэгдээ.

Буряадай тамиршад сооһоо оройдоол Мария Базарова финалда орожо шадаа. 47 килограмм хүрэтэр шэгнүүртэ тэрэ финальна уулзалгада Приморско хизаарай Нинель Савиновае илажа, чемпионой нэрэ зэргэдэ хүртөө. Ивалга һууринай Мария Базарова мэдээжэ һоригшо Юрий Доржитаровай ударидалга доро бэлэдхэл хэнэ. Владивосток хотодо тэрэ табан илалта туйлаа.

Мария Хасанова, Галина Аржутова, Алексей Серебренников, Артур Имеев, Даниил Синев, Кирилл Хлызов болон Леонид Кириллов гэгшэд шангай гурбадахи һууринуудые эзэлээ.

Түрүү һуури эзэлэгшэд Новороссийск хотодо апрелиин 21-28 үдэрнүүдтэ үнгэргэгдэхэ Ородой чемпионадта хабаадаха эрхэдэ хүртөө.